İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 71 Hüküm no: 29 Orijinal metin no: [7b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Yofko v. Pako’nun Topkapısı’ndaki uncu değirmeninin dört hissesini Kirkor v. Manuk’a iki yüz elli guruşa sattığı Mübâya‘a-i habbâz Habbâz tâifesinden Yofko v. Pako nâm zimmî meclis-i şer‘-i münîrde hâmil-i hâze’r-rakīm Kirkor v. Manuk nâm zimmî tarafından husûs-ı âti’l-beyânda ber-vech-i câ’î tasdîka vekîl-i şer‘îsi olan es-Seyyid Mehmed Said Ağa b. Abdurrahman nâm kimesne mahzarında ikrâr-ı tâm ve takrîr-i kelâm edip Mahmiye-i İstanbul’da Nakkāşpaşa’da ekmekçi fırınına merbût Top Kapısı’nda Mekteb kurbünde vâki‘ on iki sehim i‘tibâr olunan üç horoslu mu‘attal bir bâb uncu değirmeni derûnunda mevcûd[e] beyne’l-hiref gedik ta‘bîr olunur on iki re’s bargir ve âlât-ı lâzıme-i ma‘lûmenin i‘tibâr-ı mezkûr üzere akd-i âti’z-zikrin sudûruna değin yedimde mülküm olan sekiz sehmimin dört sehmini yedimde ibkā edip mâ‘adâ dört sehme isâbet [8a] eden dört re’s bargir ile dört re’s bargire iktizâ eden âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile iki yüz elli guruşa mersûm Kirkor zimmîye bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabûl ve semeni olan meblağ-ı mezbûr iki yüz elli guruşu bana def‘ ü teslîm ben-dahi yedinden tamamen tesellüm ve ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsamâtdan mersûm Kirkor zimmînin zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl eyledi. Ba‘de’l-yevm sâlifü’z-zikr dört re’s bargir ve dört re’s bargire isâbet eden âlât-ı lâzıme-i ma‘lûmede benim alâka ve medhalim kalmayup müşteri-i mersûm Kirkor zimmînin mülk-i müşterâsı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 Rebî‘ülâhir sene 1193. Şuhûdü’l-hâl: Habbâzân Kethudâsı İsmail Ağa, Yiğitbaşı Molla Ahmed, Sayıcı Molla Osman Bediroğlu Molla Ali, Çörekçi Molla Ahmed, Ahram, Vartan, diğer Vartan, Agop, Serkiz.