İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 72 Hüküm no: 30 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Sarraf Avakim v. İstefan’ın vârislerinden oğlu Sarraf Yanaki’nin kardeşi Maryem’e miras bir hisse karşılığı altı yüz guruş verip ibralaştıkları Tereke hissesini ahz ve ibrâ Vilâyet-i Anadolu’da Eğin kazâsına tâbi‘ Vank karyesinde mütemekkin iken bundan akdem hâlik olan Sarrâf Avakim v. İstefan nâm zimmînin verâseti sulbî kebîr oğlu Sarrâf Yanaki nâm zimmî ile sulbiye kebîre kızları Varvar ve Maryem nâm Nasrâniyelere münhasıra ve tashîh-i meselesi dört sehimden olup sihâm-ı mezbûreden iki sehmi mersûm Sarrâf Yanaki nâm zimmîye ve birer sehmi mersûmetân Varvar ve Maryem’den her birine isâbeti ba‘de’t-tahakkukı’ş-şer‘î hâlâ karye-i mezbûrede mütemekkine mersûm Maryem Nasrâniye tarafından husûs-ı âti’l-beyânda ber-vech-i câ’î ahz ü kabz ve ibrâya vekîl olduğu şahs-ı mesfûreyi bi’l-ma‘rifeti’ş-şer‘iyye ârifân Bağdasar v. İstefan ve Yamandi v. İstirati nâm zimmîler şehâdetleriyle şer‘an sâbit ve mütehakkık olan Sarrâf Vasil v. Pergam nâm zimmî meclis-i şer‘-i hatîr-i lâzımü’t-tevkīrde müvekkile-i mezbûrenin li-ebeveyn karındaşı olup bi’l-cümle tereke-i hâlik-i mesfûra vaz‘-ı yedi mütehakkık olan mahmiye-i İstanbul’da Hasırcılar sûkunda mütemekkin hâmil-i hâzihi’l-vesîka mersûm Sarrâf Yanaki zimmî muvâcehesinde bi’l-vekâle ikrâr-ı tâm ve takrîr-i kelâm edip mersûm Sarrâf Yanaki zimmî bi’l-verâse vâzı‘u’l-yed olduğu hâlik-i mersûm Sarrâf Avakim zimmînin karye-i mezbûrede olan bağ ve bağçe ve emlâk ve eşyâ-i ma‘lûmesinin takvîm olunan esmânından ve gerek Âsitâne-i aliyye’de olan nakd ve eşyâ ve bi’l-cümle tereke-i sâiresinden ber-vech-i tashîh-i mezkûr müvekkilem mersûme Maryem Nasrâniyenin bir sehim hisse-i irsiye-i şer‘iyyesine isâbet eden altı yüz guruşu bana def‘ ü teslîm eylediğinde, ben-dahi ber-minvâl-i muharrer bi’l-vekâle yedinden tamamen tesellüm ve ahz ü kabz edip hâlik-i mesfûrun ism-i mâl ıtlâk olunur bi’l-cümle terekesine ve husûs-ı mirasa müte‘allika âmme-i de‘âvî ve mutâlebât ve kâffe-i eymân ve muhâsamâtdan mersûm Sarrâf Yanaki zimmînin zimmetini bi’l-vekâle ibrâ-i âmm-ı kātı‘ü’n-nizâ‘ ve râfi‘ü’l-hısâm ile ibrâ ve ıskāt eylediğimde, ol dahi ibrâ-i mezkûru kabûl eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 29 Rebî‘ülâhir sene 1193. Şuhûdü’l-hâl: Mehmed Ağa Kethudâ-yı Muhzırân, Molla İsmail b. Ali, Molla Mehmed Said, Baltacı el-Hâc Mustafa, Duhânî Ali Çelebi, İstefan v. Bağdasar, Agop v. Aleksan, Margos v. Aleksan, Bağdasar v. İstefan, Yorgi v. Nikola, Yuvan v. Vasil, Anaştaş v. Semoyil, Dimitri v. Margos, Yanaki v. Margos, Siman v. Lazari, Yuvan v. Lazari.