İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 73 Hüküm no: 31 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul kemhacılar esnafının kethudalığına Ali Usta b. Osman’ın tayin edildiği Nasb-ı kethudâ-i kemhâcı Âsitâne-i aliyye’de vâki‘ kemhâcı esnâfının ihtiyâr ustalarından el-Hâc Mustafa Usta ve es-Seyyid Mehmed ve Ahmed Usta ve Hüseyin Usta ve es-Seyyid Abdullah ve Mehmed Emin ve Mehmed Usta ve Halil Usta ve es-Seyyid Ahmed ve diğer Mehmed Usta ve âhar Mehmed Usta ve Memiş Usta ve İbrahim Usta ve Kara Hasan ve İsmail Usta ve Kara İsmail nâm kimesneler ile zimmîlerden Ustabaşı Karabet ve Arutin ve Apik Karabet ve Anaştaş ve Abraham ve Ronik ve diğer Abraham ve âhar Arutin ve Agop ve Yorgi ve İstefan ve Manil ve Tavan ve Nikfos ve Bağdasar ve İstefan ve sâirleri meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip kethudâmız olan Ebûbekir Usta nâm kimesne kendi hâlinde [ve] ırzıyla mukayyed olmayıp müfsid ve müzevvir olmağla, esnâfı dâimâ tekdîr ve ta‘cîz ve tecrîm ve hilâf-ı şer‘-i mutahhar ve mugāyir-i nizâm-ı kadîm harekâta tesâddî etmekle azl olunup yerine esnâfımızın kudemâsından örf ve âdetimize vâkıf ve nizâm [ve] intizâmımızı mûcib umûr ve ahvâlimize kemâ-yenbagī ârif ve her vechile [8b] kethudâlık hizmetini rü’yete kādir ve cümlemizin muhtâr ve mu‘temedi olan işbu bâ‘isü’l-kitâb es-Seyyid Ali Usta b. Osman nâm kimesneyi kıbel-i şer‘den üzerimize kethudâ nasb ve ta‘yîn olunmak matlûbumuzdur deyü iltimâs etmeleriyle, hâkim-i muvakki‘-i sadr-ı kitâb ‒rafe‘a kadrehû mevlâhü’l-Vehhâb‒ efendi hazretleri dahi merkūm Ebûbekir Usta’yı azl ve yerine merkūm es-Seyyid Ali Usta’yı kethudâ nasb ve ta‘yîn ve umûrlarını ber-mu‘tâd-ı kadîm rü’yet ve bir ferdi hilâf-ı şer‘-i mutahhar rencîde etmemek üzere tenbîh buyurduklarında, ol dahi kabûl ve hizmet-i lâzımesini kemâ-yenbagī ikāmete ta‘ahhüd etmeğin mâ-vaka‘a bi’t-taleb ketb olundu. Fî 11 Cumâdelûlâ sene [1]193. Şuhûdü’l-hâl: Mehmed Ağa Kethudâ-yı Muhzırân, Molla İsmail b. Ali, Duhânî Ali Çelebi, el-Hâc Mustafa, Akşehirli Osman.