İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 74 Hüküm no: 32 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Sarraf Yorgi v. Abram’ın vârislerinin Sarraf Anaştaş v. Samyel’deki alacakları karşılığında iki bin beş yüz guruşu alıp ibralaştıkları İbrâ Fi’l-asl vilâyet-i Anadolu’da Eğin kazâsına tâbi‘ Vank karyesi ahâlîsinden olup mahmiye-i İstanbul’da Dîvânyolu’nda vâki‘ Süleyman Paşa Hânı’nda mütemekkin iken bundan akdem hâlik olan Sarrâf Yorgi v. Abram nâm zimmînin verâseti zevce-i metrûkesi Varvar b. Haçuk nâm Nasrâniye ile sulbî oğlu olup kendüden mukaddem hâlik olan Lazer nâm zimmînin sulbî kebîr oğulları Nikola ve Anaştaş zimmîlere ve sulbiye kebîre kızı Marina nâm Nasrâniyeye münhasıra olduğu ba‘de’t-tahakkukı’ş-şer‘î mersûm Nikola asâleten ve mesfûr Anaştaş dahi kendiden asâleten ve min-kıbeli’l-eb ceddesi mesfûre Varvar ve li-ebeveyn kız karındaşı mersûme Marina Nasrâniyeler taraflarından husûs-ı âti’l-beyânda ber-vech-i câ’î ahz ü kabz ve ibrâya vekîlleri olduğu mersûmetânın şahıslarını bi’l-ma‘rifeti’ş-şer‘iyye ârifân Dimitri v. Yuvan ve Avanes v. Vartan nâm zimmîler şehâdetleriyle şer‘an sâbit ve mütehakkık olmağla vekâleten meclis-i şer‘-i hatîr-i lâzımü’t-tevkīrde hâmil-i hâzihi’l-vesîka sarrâf-ı diğer Anaştaş v. Samyel nâm zimmî muvâcehesinde her biri ikrâr-ı tâm ve takrîr-i kelâm edip mûrisimiz hâlik-i mersûm Yorgi’nin hayatında mesfûr diğer Anaştaş zimmetinde cihet-i karzdan beş bin guruş hakkı olup kable’l-ahz ve’l-istifâ mersûm Yorgi hâlik ve meblağ-ı mezbûr bizim ile müvekkiletân-ı mersûmetâna mevrûs olmuşidi. El-hâletü-hâzihî mersûm diğer Anaştaş meblağ-ı merkūm beş bin guruşun bi-tarîkı’s-sulh iki bin beş yüz guruşunu bize def‘ ü teslîm eylediğinde, biz dahi yedinden tamamen tesellüm ve ahz edip mâ‘adâsı olan iki bin beş yüz guruş mutâlebesine ve sâire işbu târih-i vesîkaya gelince beynimizde cereyân eden bi’l-cümle ahz ü i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve kâffe-i eymân ve muhâsamâtdan mersûm diğer Anaştaş zimmînin [zimmetini] bi’l-asâle ve bi’l-vekâle ibrâ-i âmm-ı kātı‘ü’n-nizâ‘ ve râfi‘ü’l-hısâm ile ibrâ ve ıskāt eylediğimizde, ol dahi ibrâ-i mezkûru kabûl eyledi. Ba‘de’l-yevm husûs-ı merkūma ve cihat-ı sâireye müte‘allika gerek bizim ve gerek müvekkiletân-ı mersûmetân Varvar ve Marina’nın mesfûr diğer Anaştaş ile asla ve kat‘â da‘vâ ve nizâ‘ ve husûmetimiz ve yed ve zimmetinde bir akçe ve bir habbe hakkımız ve alacağımız kalmadı dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 9 Ca sene [1]193. [9a] Şuhûdü’l-hâl: Necib Mustafa Efendi b. İzzetî Mehmed Efendi, Kapı Çukadâr[ı] Hacı İbrahim Ağa, Hâncı Hacı Mehmed, Cündî Hacı İbrahim Ağa, Şehrî Mehmed Ağa, Çolak Lütfullah, Duhânî Hacı Osman, Vasil v. Pargam, Yanaki v. Avakim, Bağdasar v. ( ), Dimitri v. Ohan, Avanes v. Artin, Agop.