İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 79 Hüküm no: 38 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Silahşör Durak Mehmed Bey b. Ahmed b. Durak Mehmed Paşa’nın Mimar Sinan Mahallesi’ndeki camcı dükkânının nısfını Halil b. Abdullah’a yüz yirmi guruşa sattığı Mübâya‘a-i camcı Mahrûse-i Galata’ya muzâfe kasaba-i Beşiktaş’da Arab İskelesi kurbünde sâkin silâhşör-i hazret-i şehriyârî Durak Mehmed Bey b. Ahmed b. Durak Mehmed Paşa tarafından husûs-ı âti’l-beyânda ber-vech-i câ’î ikrâra vekîl olduğu Kahveci Ahmed b. Halil ve Turşucu İbrahim b. Halil nâm kimesneler şehâdetleriyle şer‘an sâbit ve mütehakkık olan Mehmed Ağa b. Ahmed nâm kimesne meclis-i şer‘-i şerîf-i enverde bâ‘is-i hâzihi’l-vesîka Halil b. Abdullah nâm kimesne mahzarında bi’l-vekâle ikrâr-ı tâm ve takrîr-i kelâm edip mahmiye-i İstanbul’da Sultân Mehmed Han Câmi‘-i şerîfi kurbünde Mi‘mâr Sinan Mahallesi’nde vâki‘ bir tarafdan merkūm Turşucu İbrahim dükkânı ve bir tarafdan Saray Hamalı ( ) menzili ve bir tarafdan sâbıkā Medîne-i münevvere Kādısı merhûm Bülbülî es-Seyyid Ahmed Efendi veresesi bağçesi ve bir tarafdan tarîk-i âm ile mahdûd bir bâb mülk camcı dükkânının müvekkilim mezbûr Durak Mehmed Bey’in akd-i âti’z-zikrin sudûruna değin yedinde mülk-i mevrûsu olan nısf-ı şâyi‘ini bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile yüz yirmi guruşa merkūm Halil’e bey‘ ve temlîk ve teslîm eylediğinde, ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm yüz yirmi guruşu müvekkilim mezbûra def‘ ü teslîm eylediğinde, ol dahi yedinden tamamen tesellüm ve ahz ü kabz eyledi. Ba‘de’l-yevm müvekkilim mezbûr Durak Mehmed Bey’in asla alâka ve medhali kalmayup dükkân-ı mahdûd-ı mezkûrun nısf-ı şâyi‘-i mezkûru müşteri-i mezbûr Halil’in mülk-i müşterâsı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 min-Cumâdelûlâ sene [1]193. Şuhûdü’l-hâl: Kahveci Ahmed b. Halil, Turşucu İbrahim b. Halil, Molla İsmail b. Ali.