İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 80 Hüküm no: 39 Orijinal metin no: [10a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul kassarcılar esnafının kethudalığına Ebubekir Usta b. Süleyman’ın tayin edildiği Nasb-ı kethudâ-i kassârcı Âsitâne-i aliyye’de vâki‘ kassârcı esnâfının ustalarından es-Seyyid Mehmed Usta nâm kimesne ile zimmîlerden Hacador ve Avanes ve Tatos ve Pesek? ve sâirleri meclis-i şer‘-i şerîf-i enverde takrîr-i kelâm ve ta‘bîr ani’l-merâm edip kethudâmız olan el-Hâc Ali nâm kimesne üç seneden beri diyâr-ı âhara gidüp yeri hâlî ve hizmet-i [10b] lâzımesi mu‘attal kalup yerine kethudâ nasbı lâzım ve mühim olmağla, mezbûr el-Hâc Ali azl olunup yerine esnâfımızın kudemâsından olup her vechile kethudâlık hizmetini rü’yete kādir ve cümlemizin muhtâr ve mu‘temedi olan işbu bâ‘isü’l-kitâb Ebûbekir Usta b. Süleyman nâm kimesneyi kıbel-i şer‘den üzerimize kethudâ nasb ve ta‘yîn olunmak matlûbumuzdur deyü iltimâs etmeleriyle, hâkim-i muvakki‘-i sadr-ı kitâb bi-tevkī‘ihi’r-refî‘ü’l-müstetâb ‒tûbâ-lehû ve hüsnü-meâb‒ efendi hazretleri dahi mezbûr el-Hâc Ali’yi azl ve yerine merkūm Ebûbekir Usta’yı kethudâ nasb ve ta‘yîn ve ber-mu‘tâd-ı kadîm umûrlarını rü’yet ve bir ferdi hilâf-ı şer‘-i mutahhar rencîde etmemek üzere tenbîh buyurduklarında, ol dahi kabûl ve hıdemât-i lâzımesini kemâ-yenbagī ikāmete ta‘ahhüd etmeğin mâ-vaka‘a bi’t-taleb ketb olundu. Fî 2 Cumâdelâhire sene 1193. Şuhûdü’l-hâl: Mehmed Ağa b. Ahmed Kethudâ-yı Muhzırân, Muhzır Molla İsmail b. Ali, Kemahlı İbrahim, Ahıskalı Mehmed.