İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 80 Hüküm no: 40 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Güngörmez Mahallesi’ndeki İshak Efendi Vakfı’na ait yanmış menzil arsasının keşfi ve vakıf kurucusunun evlatları arasında taksimi Taksîm-i menzil Husûs-ı âti’l-beyânın mahâllinde ketb ü tahrîri içün kıbel-i şer‘den irsâl olunan keşif nâibimiz fahrü’l-müderrisîni’l-kirâm Necibzâde es-Seyyid Feyzullah Efendi hâssa mi‘mârlarından Ahmed ve İsmail halîfeler ile mahmiye-i İstanbul’da Sultân Ahmed Han Câmi‘-i şerîfi civârında Güngörmez Mahallesi’nde vâki‘ merhûm İshak Efendi nâm sahibü’l-hayrın süknâsı evlâda meşrûta lede’l-ahâlî ma‘lûmü’l-hudûd terbî‘an bin iki yüz otuz beş zirâ‘ muhterik bir bâb menzil arsasına varup zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i kavîm ettikde, vâkıf-ı mûmâ-ileyhin evlâdı [evlâd-ı] evlâdından es-Seyyid Abdülhalim Ağa b. İbrahim meclis-i ma‘kūd-ı mezkûrda Teberdâr el-Hâc Ahmed Ağa ve kız karındaşları Ümmügülsüm Hanım ve Nefise ve Fâtıma Hanım mahzarlarında ikrâr-ı tâm ve takrîr-i kelâm edip vâkıf-ı mûmâ-ileyh arsa-i mezkûr üzerinde bir bâb menzilin süknâ ve tevliyetini kendiden sonra evlâdına ve evlâd-ı evlâdına şart ve ta‘yîn edip ve bizler evlâd-ı vâkıfdan menzil-i mezkûrun süknâ ve tevliyeti el-yevm tasarrufumuzda olmağla ba‘de’l-harîk arsa-i sırfa kalup ve her birimiz dahi süknâya muhtâc ve arsa-i mezkûre kābil-i taksîm olup ve karındaşlarım evlâd-ı vâkıfdan es-Seyyid Mehmed Ağa ve Şerîfe Râbia Hanım hakk-ı tasarruflarını rızâlarıyla bana ferâğ ve kasr-ı yed etmeleriyle süknâ içün menzil binâ etmek üzere arsa-i mezkûrda her birimizin hissesi ifrâz ve taksîm olunmak matlûbumuzdur dedikde mezbûrûn dahi ber-vech-i muharrer tasdîk ve mi‘mârân-ı mezbûrân dahi ba‘de’n-nazar misâha eylediklerinde, arsa-i mezkûre bir tarafdan es-Seyyid İbrahim Efendi menzili ve bir tarafdan mülk bağçe ve bir tarafdan mezbûre Nefise Hanım içün ifrâz olunan arsa ve taraf-ı râbi‘i tarîk-i âm ile mahdûd tûlen ve arzen bi-hisâb-ı terbî‘î iki yüz kırk yedi zirâ‘ arsalı mahalli mezbûre Ümmügülsüm Hanım içün ifrâz ve ta‘yîn ve yine ittisâlinde vâki‘ bir tarafdan mezbûre Ümmügülsüm Hanım içün ifrâz olunan arsa ve bir tarafdan mülk bağçe-i mezkûre ve bir tarafdan Fâtıma Hanım içün ifrâz olunan arsa ve taraf-ı râbi‘i tarîk-i âm ile mahdûd tûlen ve arzen bi-hisâb-ı terbî‘î iki yüz kırk yedi zirâ‘ arsalı mahalli mezbûre Nefise Hanım içün ifrâz ve ta‘yîn ve yine ittisâlinde vâki‘ bir tarafdan mezbûre Nefise Hanım içün ifrâz olunan arsa ve bir tarafdan mülk bağçe-i mezkûre ve bir tarafdan es-Seyyid Abdülhalim Ağa içün ifrâz olunan arsa ve ba‘zan mezbûr Teberdâr el-Hâc Ahmed Ağa içün ifrâz olunan arsa ve taraf-ı râbi‘i tarîk-i âm ile mahdûd tûlen ve arzen bi-hisâb-ı terbî‘î iki yüz kırk yedi zirâ‘ arsalı mahalli mezbûre Fâtıma Hanım içün ifrâz ve ta‘yîn ve yine ittisâlinde vâki‘ bir tarafdan mezbûr Abdülhalim Ağa içün ifrâz olunan arsa ve bir tarafdan Fâtıma Hanım içün ifrâz olunan arsa [11a] ve tarafeyni tarîk-i âm ile mahdûd tûlen ve arzen bi-hisâb-ı terbî‘î iki yüz kırk yedi zirâ‘ arsalı mahalli mezbûr el-Hâc Ahmed Ağa içün ifrâz ve ta‘yîn ve yine ittisâlinde vâki‘ bir tarafdan mülk bağçe-i mezkûre ve bir tarafdan Fâtıma Hanım içün ifrâz olunan arsa ve bir tarafdan Teberdâr-ı mezbûr el-Hâc Ahmed Ağa içün ifrâz olunan arsa ve taraf-ı râbi‘i tarîk-i âm ile mahdûd tûlen ve arzen bi-hisâb-ı terbî‘î iki yüz kırk yedi zirâ‘ arsalı mahalli mezbûr Abdülhalim Ağa içün ifrâz ve ta‘yîn ve tahsîs ve alâmât-ı fâsıla vaz‘ıyla temyîz ve ol vechile beynlerinde bi’t-terâzî iktisâm edip her biri hisse-i müfreze-i mezkûrelerini kabz ve kabûl etmeleriyle, gıbbe’t-tasdîkı’ş-şer‘î vâki‘ hâli mevlânâ-yı mûmâ-ileyh mahâllinde ketb ü tahrîr ve ba‘dehû ma‘an meb‘ûs ümenâ’-i şer‘le meclis-i şer‘a gelüp alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb ü imlâ olundu. Fî 23 min-Cumâdelûlâ [sene 1193]. Şuhûdü’l-hâl: Hâfız Ali b. Halil, Mehmed b. Halil, Ömer Usta b. Mehmed, Hasan Efendi b. Abdullah, Mehmed Emin Efendi b. Halil, Hâfız Süleyman b. Mehmed, Müezzin Mehmed b. Hüseyin, es-Seyyid Hasan Ağa b. Abdullah.