İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 82 Hüküm no: 41 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Kasım b. Ali, Kiro v. Piyo ile Milo v. Yani’nin Kadırga Limanı yakınındaki ekmekçi fırını ve Unkapanı Kapısı’ndaki değirmenin on hissesini Ali Beşe b. Ali ve Abdurrahman b. Mehmed’e toplam iki bin dört yüz guruşa sattıkları Mübâya‘a Habbâz tâifesinden Kasım b. Ali nâm kimesne ile Kiro v. Piyo ve Milo v. Yani nâm zimmîler taraflarından husûs-ı âti’l-beyânda ber-vech-i câ’î ikrâra vekîlleri olduğu Hüseyin Beşe b. Abdullah ve Molla Ali b. el-Hâc Mustafa nâm kimesneler şehâdetleriyle şer‘an sâbit ve mütehakkık olan Receb Beşe b. Osman nâm kimesne meclis-i şer‘-i şerîf-i enverde bâ‘iseyü’l-vesîka Ali Beşe b. Ali ve Abdurrahman b. Mehmed nâm kimesneler mahzarlarında bi’l-vekâle ikrâr-ı tâm ve takrîr-i kelâm edip mahmiye-i İstanbul’da Kadırga Limanı kurbünde Pâyzen Hânı ittisâlinde vâki‘ bir bâb ekmekci fırını ve ona merbût Unkapanı Kapısı dâhilinde Yâğhâne karşusunda kâin yirmi sehim i‘tibâr olunan beş horoslu bir bâb değirmen derûnunda mevcûde beyne’l-hiref gedik ta‘bîr olunur yirmi re’s bargirde müvekkillerim mezbûrûn Kasım ve Kiro ve Milo akd-i âti’z-zikrin sudûruna dek ale’l-iştirâki’s-seviy yedlerinde mülkleri olan on re’s bargirden yedi re’s bargir ile yedi re’s bargire isâbet eden âlât-ı lâzıme-i ma‘lûmelerini bin altı yüz seksen guruşa mezbûr Ali Beşe’ye ve üç re’s bargir ile üç re’s bargire isâbet eden âlât-ı lâzıme-i ma‘lûmelerini yedi yüz yirmi guruşa mezbûr Abdurrahman’a tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile bey‘ ve temlîk ve teslîm eylediklerinde, onlar dahi ber-vech-i muharrer iştirâ ve temellük ve tesellüm ve kabûl eylediklerinden sonra semenleri olan cem‘an iki bin dört yüz guruşun bin guruşunu hınta semeninden cânib-i mîrîye seviyen zimmetlerinde olan deynleri ile bin dört yüz guruşunu ma‘lûmü’l-esâmî kimesnelere olan deynlerini edâ ve teslîm etmek üzere mezbûrân Ali Beşe ve <> Abdurrahman’a emreylediklerinde, onlar dahi ber-vech-i meşrûh meblağ-ı mecmû‘-ı mezkûr ile emrlerine binâen düyûn-ı merkūmelerini edâ ve teslîme ta‘ahhüd ve iltizâm eylediklerinden sonra mebî‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsamâtdan müvekkillerim mezbûrûn-ı merkūmân Ali Beşe ve Abdurrahman’ın zimmetlerini ibrâ-i âm ile ibrâ ve ıskāt eylediklerinde, onlar dahi ibrâ-i mezkûru kabûl eylediler. Ba‘de’l-yevm müvekkillerim mezbûrûnun asla alâka ve medhalleri kalmayup sâlifü’z-zikr yedi re’s bargir ile yedi re’s bargire isâbet eden âlât-ı lâzıme-i ma‘lûme mezbûr Ali Beşe’nin ve mârrü’z-zikr üç re’s bargir ile üç bargire isâbet eden âlât-ı lâzıme-i ma‘lûme merkūm Abdurrahman’ın mülk-i müşterâları olmuşdur, keyfe mâ yeşâ’ ve yahtâr mutasarrıfân olsunlar dediler dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 20 Cumâdelûlâ sene [1]193. Şuhûdü’l-hâl: Ekmekciler Kethudâsı İsmail Ağa, Yiğitbaşı Ahmed Ağa, Fındıklılı Mehmed Ağa, es-Seyyid el-Hâc Ahmed Ağa, Sayıcı Molla Osman, es-Seyyid Mehmed Said Ağa.