İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 83 Hüküm no: 42 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kokona bt. Yorgi’nin Lanka Çeşmesi yakınındaki çörekçi fırını gediğini Çörekçi Milo v. Nedelko’ya bin sekiz yüz guruşa sattığı Mübâya‘a Mahmiye-i İstanbul’da Langa-i kebîr kurbünde Kâtibkasım Mahallesi’nde mütemekkine ve şahsı zeyl-i kitâbda mektûbü’l-esâmî Müslimîn ta‘rîfleriyle mu‘arrefe olan Kokona bt. Yorgi nâm Nasrâniye meclis-i şer‘-i hatîr-i lâzımü’t-tevkīrde Çörekçi tâifesinden hâmil-i hâze’l-vesîka Milo v. Nedelko nâm zimmî muvâcehesinde ikrâr-ı tâm ve takrîr-i kelâm edip mahalle-i merkūmede Langa Çeşmesi kurbünde vâki‘ bir bâb çörekçi fırını derûnunda mevcûde [11b] beyne’l-hiref gedik ta‘bîr olunur akd-i âti’z-zikrin sudûruna değin yedimde mülküm olan yüz vakıyye bakır ile âlât-ı lâzıme-i sâire-i ma‘lûmenin nısf-ı şâyi‘ini yedimde ba‘de’l-ibkā nısf-ı şâyi‘-i âharını tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile bin sekiz yüz guruşa mersûm Milo zimmîye bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabûl ve semeni olan meblağ-ı merkūm bin sekiz yüz guruşu bana def‘ ü teslîm eylediğinde, ben-dahi yedinden bi’t-tamam ve’l-kemâl tesellüm ve ahz ü kabz edip mebî‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsamâtdan mersûm Milo zimmînin zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl eyledi. Ba‘de’l-yevm âlât-ı merkūmenin nısf-ı şâyi‘-i âhar-ı mezkûrunda benim alâkam kalmayup müşteri-i mersûm Milo zimmînin mülk-i müşterâsı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb ve imlâ olundu. Fî 11 Cumâdelâhire sene [1]193. Şuhûdü’l-hâl: Çörekçiler Kethudâsı Osman Ağa b. Mahmud, Yiğitbaşı Mehmed b. Ahmed, Süleyman Efendi b. Abdullah, es-Seyyid İsmail Çelebi b. Hüseyin, Hacı Bedros v. Bogos, Piyo v. Yabo, Hristo v. Yuvan, Agop v. Arakel.