İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 84 Hüküm no: 43 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bezzasistanî Mehmed Emin Efendi b. İbrahim’in Mekke’de bulunan Tayyibzade Mustafa b. Mehmed’in vekili olduğunu isbat ettiği ve Sarraf Yontof v. Manil’den alacakları altı bin otuz sekiz guruşu alıp ibralaştıkları İsbât-ı vekâlet Mahmiye-i İstanbul’da Camcı Ali Mahallesi ahâlîsinden olup işbu târih-i vesîka senesi Mekke-i mükerreme’de mücâveret vechi üzere sâkin olan Tayyibzâde el-Hâc Mustafa b. el-Hâc Mehmed nâm kimesne tarafından ber-vech-i âtî iddi‘â-yı vekâlet eden eşrâf-ı kuzât-ı Mısrıye’den Bezzâsistânî Mehmed Emin Efendi b. el-Hâc İbrahim nâm kimesne meclis-i şer‘-i hatîr-i lâzımü’t-tevkīrde hâmil-i hâzihi’l-vesîka Sarrâf Yontof v. Manil nâm Yahûdî muvâcehesinde üzerine da‘vâ ve takrîr-i kelâm edip mezbûr el-Hâc Mustafa’nın mersûm Yontof Yahûdî zimmetinde bâ-temessük cihet-i karzdan altı bin otuz sekiz guruş hakkı olmağla, bin yüz doksan iki senesi Recebi’l-ferdi’nin on beşinci günü târihinde merkūm el-Hâc Mustafa Hâcc-ı şerîfe azîmeti esnâsında meblağ-ı mezbûr altı bin otuz sekiz guruşu mersûm Yontof Yahûdiden taleb ve da‘vâ ve ahz ü kabza ve kendüye îsâl ve teslîme ve bunlar mütevakkıf olduğu umûrun küllîsine tarafından beni vekâlet-i sahîha-i şer‘iyye ile vekîl ve nâib-i menâb nasb ve ta‘yîn eylediğinde, ben-dahi vekâlet-i merkūmeyi kabûl ve merâsimini kemâ-yenbagī edâya ta‘ahhüd ve iltizâm etmemle meblağ-ı mezbûru vekâlet-i mahkiyem hasebiyle mersûm Yontof Yahûdiden taleb ederim deyü da‘vâ [eylediğimde], ol dahi cevâbında meblağ-ı merkūm altı bin otuz sekiz guruşu ber-minvâl-i muharrer cihet-i mezkûreden zimmetinde mezbûr el-Hâc Mustafa’ya deyni olduğunu ikrâr lâkin mezbûr Mehmed Emin Efendi’nin vekâlet-i mezkûre müdde‘âsını ba‘de’l-inkâr merkūm Mehmed Emin Efendi’den ber-vech-i muharrer müdde‘âsını mübeyyine beyyine taleb olundukda, udûl-i ahrâr-ı ricâl-i Müslimînden ve mahalle-i merkūme ahâlîsinden Hâfız el-Hâc Abdurrahman Efendi b. el-Hâc Osman ve es-Seyyid Abdurrahman b. Ahmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında, fi’l-hakīka merkūm Tayyibzâde el-Hâc Mustafa b. el-Hâc Mehmed bin yüz doksan iki senesi Recebi’l-ferdi’nin on beşinci günü târihinde Hâcc-ı şerîfe azîmeti esnâsında işbu mersûm Yontof Yahûdî zimmetinde ber-mantûk-ı temessük cihet-i karzdan hakkı olan meblağ-ı mezbûr altı bin otuz sekiz guruşu mersûm Yontof Yahûdiden taleb [12a] ve da‘vâ ve ahz ve kabza ve kendüye îsâl ve teslîme ve bunlar mütevakkıf olduğu umûrun küllîsine tarafından mezbûr Mehmed Emin Efendi’yi bizim huzûrumuzda vekâlet-i sahîha-i şer‘iyye ile vekîl ve nâib-i menâb nasb ve ta‘yîn eylediğinde, ol dahi ber-minvâl-i muharrer vekâlet-i mezkûreyi kabûl ve merâsimini kemâ-yenbagī edâya ta‘ahhüd ve iltizâm eyledi. Biz bu husûsa bu vech üzere şâhidleriz [ve] şehâdet dahi ederiz deyü her biri edâ-i şehâdet-i şer‘iyye eylediklerinde, gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mezbûr Mehmed Emin Efendi meclis-i şer‘-i münîrde mersûm Yontof Yahûdî muvâcehesinde i‘âde-i kelâm edip ânifen edâsına hükm-i şer‘î lâhık olan meblağ-ı merkūm altı bin otuz sekiz guruşu mersûm Yontof Yahûdî bana edâ ve teslîm eylediğinde, ben-dahi ber-minvâl-i muharrer yedinden tamamen ve kâmilen bi’l-vekâle ahz ü kabz edip husûs-ı mezkûra müte‘allika âmme-i da‘vâdan mersûm Yontof Yahûdinin zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 min-Cumâdelûlâ sene [1]193. Şuhûdü’l-hâl: Teberdâr el-Hâc Abdülkerim Ağa b. Abdurrahman, Helvâcı Hasan Ağa b. Osman, Şâtır Ömer Ağa b. Ahmed tâbi‘-i Emîn-i Gümrük el-Hâc İsmail Ağa, Kâtib Molla Mustafa b. Mehmed, Haseki Salih Ağa b. Ebûbekir, Ahmed Efendi b. Abdullah.