İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 85 Hüküm no: 44 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kılabdancı Bedros v. Mankasar’ın Şeyhferhad Mahallesi’ndeki menzilinin nısfını kızı Karine’ye bin guruşa sattığı Mübâya‘a-i menzil-i nısf Mahmiye-i İstanbul’da Şeyhferhad Mahallesi’nde mütemekkin Kılabdancı Bedros v. Mankasar nâm zimmî meclis-i şer‘-i şerîf-i enverde sadriye kebîre kızı hâmiletü hâzihi’l-vesîka Karine nâm Nasrâniye tarafından ber-vech-i âtî tasdîka vekîl-i şer‘îsi Bağdasar v. Melkon nâm zimmî muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna dek müstakillen yedimde mülküm olup mahalle-i merkūmede vâki‘ bir tarafdan Dülbendci Panos zimmî menzili ve bir tarafdan Dülbendci Avanes zimmî menzili ve bir tarafdan Kürkçü Avakim zimmî menzili ve bir tarafdan tarîk-i âm ile mahdûd fevkānî bir oda ve bir sofa ve bir matbah ve tahtânî bir küçük oda ve bağçe ve kârgir mahzen ve sahrnıç ve kenîf ve bir matbah ocağı ve müştemilât-ı sâire-i ma‘lûmeyi hâvî bir bâb mülk menzilimin nısf-ı şâyi‘ini bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile bin guruşa kızım müvekkile-i mezbûre Karine Nasrâniyeye bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr bin guruş mutâlebesinden kızım müvekkile-i mersûme Karine Nasrâniyenin zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl eyledi. Ba‘de’l-yevm menzil-i mahdûd-ı mezkûrun nısf-ı şâyi‘-i mezkûresinde benim asla alâkam kalmayup kızım müvekkile-i mersûme Karine Nasrâniyenin mülk-i müşterâsı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 26 C sene [11]93. Şuhûdü’l-hâl: Simkeş el-Hâc Osman, Kethudâ Salih Ağa, Sâ‘atci Osman Ağa, Çavuş Osman Ağa, Ekmekci Agop, Basmacı İstefan, Basmacı Apik, Basmacı Rafail, Basmacı Karabet.