İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 86 Hüküm no: 45 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Serkiz v. Kigork’un vârislerinin Yedikule dışındaki fırın ve değirmendeki hisseleri hususunda diğer bir vâris Agisa v. Manas ile ibralaştıkları Sulh-ı fırın ve değirmen hâric-i Yedikule Mahmiye-i İstanbul’da Kâtibkasım Mahallesi’nde mütemekkin iken bundan akdem hâlik olan Serkiz v. Kigork nâm zimmînin verâseti li-ebeveyn kız karındaşları Aranohi ve Melak ve İskohi nâm Nasrâniyelere münhasıra olduğu ba‘de’t-tahakkukı’ş-şer‘î mersûmetân Melak ve İskohi taraflarından husûs-ı âti’l-beyânda ber-vech-i câ’î da‘vâ ve sulh ve ibrâya vekîlleri olduğu mersûmetânın şahıslarını bi’l-ma‘rifeti’ş-şer‘iyye ârifân Sahak v. Agop ve Mıgırdıc v. Avanes nâm zimmîler şehâdetleriyle şer‘an sâbit ve mütehakkık olan mersûme İskohi Nasrâniyenin sadrî kebîr oğlu Kigork v. Bogos nâm zimmî meclis-i şer‘-i hatîr-i lâzımü’t-tevkīrde hâlik-i mersûm Serkiz’den sonra hâlike olan mersûme Aranohi’nin zevci hâmil-i hâze’l-vesîka Agisa v. Manas nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i merkūmede Yedikule hâricinde vâki‘ bir bâb ekmekci fırını ve ona merbût ittisâlinde [kâin] altı horoslu bir bâb değirmen derûnunda mevcûde beyne’l-hiref gedik ta‘bîr olunur yirmi dört bargir ve sâir âlât-ı lâzıme-i ma‘lûmenin iki re’s bargir ile on dokuz mıhı mersûm Serkiz zimmînin hayatında ile’l-helâk yedinde mülkü ba‘de helâkihî üç sehim i‘tibâriyle birer sehmi müvekkiletân-ı mersûmetân Melak ve İskohi Nasrâniyelerden her birine ve bir sehmi mesfûr Agisa’nın zevcesi hâlike-i mersûme Aranohi’ye mevrûs oldukdan sonra mersûm Agisa zevcesi hâlike-i mersûmenin bir sehim hissesi olmak tekarrübiyle sâlifü’z-zikr iki re’s bargir ve on dokuz mıhın mecmû‘unu bin yüz seksen dört senesi Recebi’l-ferdi’nin onuncu günü târihinden beri bi-gayr-ı hakkın müstakillen zabtetmekle, mârrü’z-zikr iki re’s bargir ve on dokuz mıhdan müvekkiletân-ı mersûmetânın birer sehim hisse-i irsiyelerini bundan akdem mersûm Agisa zimmîden bi’l-vekâle taleb ve da‘vâ eylediğimde, beynimizde münâza‘ât-ı kesîre ve muhâsemât-ı şedîde cereyân etmişidi. El-hâletü-hâzihî mersûm Agisa zimmî zikrolunan iki re’s bargir ve on dokuz mıhın bir re’s bargir ile dokuz-buçuk mıhını müvekkiletân-ı mersûmetân içün bi-tarîkı’s-sulh bana def‘ ü teslîm eylediğinde, ben-dahi bi’l-vekâle yedinden tesellüm ve ahz ü kabz ve kabûl edip mâ‘adâsına ve târih-i mezkûrdan işbu târih-i kitâba gelince iktizâ eden icâre ve fâiz mutâlebesine ve bi’l-cümle husûs-ı mezbûra müte‘allika âmme-i da‘vâdan ben mesfûr Agisa zimmînin zimmetini ibrâ-i âm ile ibrâ ve ıskāt eylediğimde, ol dahi müvekkiletân-ı mersûmetân içün bana def‘ ü teslîm eylediği mârrü’z-zikr bir re’s bargir ve dokuz-buçuk mıha ve bi’l-cümle husûs-ı merkūma müte‘allika kezâlik âmme-i da‘vâdan müvekkiletân-ı mersûmetân Melak ve İskohi Nasrâniyelerin zimmetlerini ibrâ-i âm ile ibrâ ve ıskāt edip ve her birimiz bi’l-asâle ve bi’l-vekâle âharın ibrâsını kabûl eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Recebi’l-ferd sene [1]193. Şuhûdü’l-hâl: Mehmed Ağa b. Abdullah, Yiğitbaşı Ahmed, İsmail Çelebi b. Ali, Bedirzâde Molla Ali b. ( ), el-Hâc Mustafa, Pelav-oğlu Abram v. Kasber, Vartan v. Toma, Semerci-oğlu Agop, Ayazmalı Serkiz.