İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 87 Hüküm no: 46 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul paçacılar esnafı kethudalığına Mustafa Usta b. Süleyman’ın tayin edildiği Kethudâ-yı paçacıyân Âsitâne-i aliyye’de vâki‘ paçacı esnâfının ihtiyâr ustalarından Hasan Usta ve Ahmed Usta ve İsmail Usta ve Ali Usta ve Mehmed Usta ve diğer Hasan Usta ve Osman Usta ve âhar Ali Usta ve Ebûbekir Usta ve Selim Usta ve diğer [13a] Ebûbekir Usta ve Hüseyin Usta ve Muhtâr Usta ve zimmîlerden Kano ve Hristo ve Kolo ve [diğer] Kano meclis-i şer‘-i şerîf-i enverde takrîr-i kelâm ve ta‘bîr ani’l-merâm edip kethudâmız olan Hüseyin Usta b. İsmail umûr ve mesâlihimizi rü’yetde tekâsül ve aczi olduğundan kethudâlıkdan bi’l-külliye keff-i yed etmekle, işbu bâ‘isü’l-kitâb Mustafa Usta b. Süleyman nâm kimesne örf ve âdetimize vâkıf ve nizâm ve intizâmımızı mûcib olan umûr ve ahvâlimize kemâ-yenbagī ârif [ve] esnâfımızın kudemâsından ve her vechile kethudâlık umûrunu rü’yete kādir ve cümlemizin muhtârı olmağla, kıbel-i şer‘den merkūm Mustafa Usta üzerimize kethudâ nasb ve ta‘yîn olunmak matlûbumuzdur deyü iltimâs etmeleriyle, hâkim-i muvakki‘-i sadr-ı kitâb ‒rafe‘a kadrehû mevlâhü’l-Vehhâb‒ efendi hazretleri dahi esnâf-ı mezbûrenin üzerlerine merkūm Mustafa Usta’yı kethudâ nasb ve ta‘yîn ve umûrlarını ber-mu‘tâd-ı kadîm rü’yet ve bir ferdi hilâf-ı şer‘-i mutahhara rencîde etmemek üzere tenbîh buyurduklarında, ol dahi kabûl ve hidemât-ı lâzımesini mahâllinde kemâ-yenbagī ikāmete ta‘ahhüd etmeğin mâ-vaka‘a bi’t-taleb ketb olundu. Fî 24 min-Cumâdelâhire sene [1]193. Şuhûdü’l-hâl: Mumcu Osman Beşe b. Mehmed, Halil Çelebi b. Mustafa, Mehmed Ağa b. Abdullah.