İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 89 Hüküm no: 48 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Mustafa Ağa b. İsmail ve kardeşi Hüseyin Ağa’nın Üsküdar Uncular Çarşısı’ndaki uncu değirmenin dört hissesini Avanes v. Kapril’e altı yüz guruşa sattıkları Mübâya‘a Uncu tâifesinden es-Seyyid Mustafa Ağa b. İsmail nâm kimesne kendiden asâleten ve li-ebeveyn karındaşı es-Seyyid Hüseyin Ağa tarafından husûs-ı âtiyyü’l-beyânda ber-vech-i câ’î bey‘ ve kabz-ı semen ve ibrâya vekîl olduğu Uncular Kethudâsı Mustafa Ağa b. Ahmed ve el-Hâc Abdullah b. el-Hâc Mehmed kimesneler şehâdetleriyle şer‘an sâbit ve mütehakkık olmağla vekâleten meclis-i şer‘-i şerîf-i enverde hâmil-i hâze’l-vesîka Avanes v. Kapril nâm zimmî muvâcehesinde ikrâr-ı tâm ve takrîr-i kelâm edip müvekkilim karındaşım mezbûr es-Seyyid Hüseyin Ağa ile akd-i âti’z-zikrin sudûruna dek bi’l-münâsafa yedimizde mülkümüz olup medîne-i Üsküdar’da Uncular sûkunda vâki‘ yirmi sehim i‘tibâr olunan beş horoslu bir bâb uncu değirmeni derûnunda mevcûde beyne’l-hiref gedik ta‘bîr olunur yirmi re’s bargirin on altı re’sini yedimizde ba‘de’l-ibkā mâ‘adâsı olan dört re’s bargir ve dört re’s bargire isâbet eden âlât-ı lâzıme-i ma‘lûmeyi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile altı yüz guruşa bi’l-asâle ve bi’l-vekâle mersûm Avanes zimmîye bey‘ ve temlîk ve teslîm eylediğimde, ol dahi ber-minvâl-i muharrer iştirâ ve temellük ve tesellüm ve kabûl ve semeni olan meblağ-ı merkūm altı yüz guruşu bana def‘ ve teslîm eylediğinde, ben-dahi yedinden tamamen tesellüm ve ahz ve kabz edip mebî‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsemâtdan mersûm Avanes zimmînin zimmetini ibrâ-i âm ile bi’l-asâle ve bi’l-vekâle ibrâ ve ıskāt eylediğimde, ol dahi ibrâ-i mezkûru kabûl eyledi. Ba‘de’l-yevm sâlifü’z-zikr dört re’s bargir ve dört re’s bargire isâbet eden âlât-ı lâzıme-i ma‘lûmede benim ve müvekkilim mezbûrun asla alâka ve medhalimiz kalmayup müşteri-i mersûm Avanes zimmînin mülk-i müşterâsı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 16 min-Receb sene [1]193. Şuhûdü’l-hâl: İsmail Ağa Kethudâ-yı Habbâzân, Yiğitbaşı Ahmed Ağa Bedir-zâde, Hâfız Mustafa, Molla Ali Bedir-zâde.