İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 90 Hüküm no: 49 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Sahak v. Bogos’un Nahılbend’deki ekmekçi fırını ve At Meydanı’ndaki değirmenin iki hissesini Bedros v. Serkiz’e beş yüz guruşa sattığı Mübâya‘a Habbâz tâifesinden Sahak v. Bogos nâm zimmî meclis-i şer‘-i şerîf-i enverde hâmil-i hâzihi’l-vesîka Bedros v. Serkiz nâm zimmî muvâcehesinde ikrâr-ı tâm ve takrîr-i kelâm edip mahmiye-i İstanbul’da Nahılbend nâm mahâlde vâki‘ bir bâb ekmekci fırını ve ona merbût At Meydânı’nda on altı sehim i‘tibâr olunan dört horoslu bir bâb değirmen [14a] derûnunda mevcûde beyne’l-hiref gedik ta‘bîr olunur on altı re’s bargirden akd-i âtiyyü’z-zikrin sudûruna dek yedimde mülküm olan iki re’s bargir ve iki re’s bargire isâbet eden âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile beş yüz guruşa mersûm Bedros zimmîye bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabûl ve semeni olan meblağ-ı mezbûr beş yüz guruşu bana def‘ ü teslîm eylediğinde, ben-dahi yedinden tamamen ve kâmilen tesellüm ve ahz ü kabz edip mebî‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsamâtdan mersûm Bedros zimmînin zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl eyledi. Ba‘de’l-yevm benim asla <> alâka ve medhalim kalmayup sâlifü’z-zikr iki re’s bargir ve iki re’s bargire isâbet eden âlât-ı lâzıme-i ma‘lûme müşteri-i merkūm Bedros zimmînin mülk-i müşterâsı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 26 min-Receb sene 1193. Şuhûdü’l-hâl: Mustafa Ağa b. ( ), es-Seyyid Mehmed Said Ağa b. ( ), Bedirzâde Molla Ali b. ( ).