İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 94 Hüküm no: 55 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapıcıbaşı Ali Bey b. Yahya Paşa’nın Elvanzâde Mahallesi’ndeki simitçi fırını binasını Kasımzâde Hüseyin Ağa’ya bin guruşa satıp arsasını devrettiği Mübâya‘a-i fırın Mahmiye-i İstanbul’da Ayasofya-i kebîr Câmi‘-i şerîfi kurbünde sâkin umdetü’l-emâcid ve’l-e‘âlî câmi‘ü’l-mehâmid ve’l-me‘âlî Ser-bevvâbîn-i Dergâh-ı âlî Ali Bey b. el-merhûm el-mebrûr Yahya Paşa tarafından husûs-ı âti’l-beyânda ber-vech-i câ’î ikrâra vekîl olduğu Mustafa Efendi b. Mehmed ve Ali Ağa b. Halil nâm kimesneler şehâdetleriyle şer‘an sâbit ve mütehakkık olan es-Seyyid Mehmed Sâdık Efendi b. eş-Şeyh Mustafa Efendi meclis-i şer‘-i hatîr-i lâzımü’t-tevkīrde işbu bâ‘isü’l-kitâb el-Hâc Kasımzâde es-Seyyid el-Hâc Hüseyin Ağa mahzarında bi’l-vekâle ikrâr-ı tâm ve takrîr-i kelâm edip arsası Elvanzâde Zâviyesi Vakfı’na beher şehr on altı buçuk akçe mukāta‘a-i kadîme ile müvekkilim mûmâ-ileyh Ali Bey’in taht-ı tasarrufunda ve üzerinde kâin bi’l-cümle ebniye-i ma‘lûmesi bâ-hüccet-i şer‘iyye akd-i âti’z-zikrin sudûruna dek yedinde mülkü olup mahmiye-i merkūmede Demirkapu kurbünde Elvanzâde Mahallesi’nde vâki‘ lede’l-ahâlî ve’l-cîrân ma‘lûmü’l-hudûd bir bâb simidci fırınının ebniye-i memlûkesini müvekkilim mûmâ-ileyh Ali Bey bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile bin guruşa mezbûr es-Seyyid el-Hâc Hüseyin Ağa’ya bey‘ ve temlîk ve arsa-i mezkûresini dahi bâ-ma‘rifet-i mütevellî ferâğ-ı kat‘î ile ferâğ ve tefvîz eylediğinde, ol dahi ber-minvâl-i muharrer iştirâ ve temellük ve tefevvüz ve tesellüm ve kabûl eyledikden sonra semeni olan meblağ-ı mezbûr bin guruşu müvekkilim mûmâ-ileyh Ali Bey’e def‘ ü teslîm eylediğinde, ol dahi yedinden tamamen ve kâmilen ahz ü kabz eyledi. Ba‘de’l-yevm sâlifü’z-zikr simidci fırınının ebniye ve arsası müşteri-i merkūm es-Seyyid el-Hâc Hüseyin Ağa’nın mülk-i müşterâsı ve dâhil-i havza-i tasarrufu olup müvekkilim mûmâ-ileyh Ali Bey’in asla ve kat‘â alâka ve medhali kalmamışdır, keyfe mâ yeşâ’ ve hasbe-mâ-yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 Şa‘bân sene [1]193. Şuhûdü’l-hâl: Hurşîd Osman Ağa Silâhşör-i hazret-i şehriyârî, Hazînedâr Mehmed Ağa b. ( ), es-Seyyid el-Hâc Abdülvahhab Ağa b. ( ), Başçukadâr Halil Ağa b. ( ), el-Hâc Hüseyin Ağa Kaftânî.