İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 95 Hüküm no: 56 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Mehmed Ağa b. İsmail’in Fındıklı ve Büyükdere’deki üç ekmekçi fırını ile Fındıklı’daki değirmenin otuz iki hissesini karısı Emetullah b. Ali’ye üç bin iki yüz guruşa sattığı Mübâya‘a-i habbâz Habbâz tâifesinden Mehmed Ağa b. el-Hâc İsmail nâm kimesne meclis-i şer‘-i hatîr-i lâzımü’t-tevkīrde hâlâ zevcesi olup zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan bâ‘isetü hâzihi’l-vesîka Emetullah b. el-Hâc Ali nâm hatun mahzarında ikrâr-ı tâm takrîr-i kelâm edip mahrûse-i Galata’ya muzâfe Fındıklı’da Mezarlık karşusında vâki‘ bir bâb ve Büyükdere’de vâki‘ iki bâb ki, cem‘an üç bâb ekmekçi fırınları ile zikrolunan fırınlara merbût sâlifü’z-zikr Fındıklı fırını ittisâlinde kâin dokuz horoslu bir bâb değirmen derûnunda mevcûde beyne’l-hiref gedik ta‘bîr olunur akd-i âti’z-zikrin sudûrune dek yedimde mülküm olan otuz altı re’s bargirin otuz iki re’s ile otuz iki re’s bargire isâbet eden âlât-ı lâzıme-i ma‘lûmemi tarafeynden îcâb ve kabûlü hâvî [16a] şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile üç bin iki yüz guruşa mezbûre Emetullah Hatun’a bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı merkūm üç bin iki yüz guruşu bana def‘ ü teslîm eylediğinde, ben dahi yedinden tamamen ve kâmilen tesellüm ve ahz ü kabz edip mebî‘-i mezkûrun tağrîr ve gabnine ve gedik husûsuna müte‘allika [âmme-i] de‘âvî ve mutâlebât ve kâffe-i eymân ve muhâsamâtdan mezbûre Emetullah Hatun’un zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl eyledi. Ba‘de’l-yevm zikrolunan otuz iki re’s bargir ile otuz iki re’s bargire isâbet eden âlât-ı lâzıme-i ma‘lûme müşteriyye-i mezbûrenin mülk-i müşterâsı olup benim asla alâka ve medhalim kalmamışdır, keyfe mâ teşâ’ ve tahtâr mutasarrıfe olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 10 min-Şa‘bân sene [1]193. Şuhûdü’l-hâl: Kethudâ-yı Habbâzân İsmail Ağa, Kanlıfırınlı Ahmed Ağa, Mustafa Kethudâ-yı Uncuyân, Bediroğlu Molla Ali, es-Seyyid Mehmed Said Ağa.