İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 97 Hüküm no: 58 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul kundakçılar esnafının kethudalığına Ahmed Usta b. Veliyüddin’in tayin edildiği Nasb-ı kethudâ Mahmiye-i İstanbul’da vâki‘ kundâkcılar esnâfının yiğitbaşıları Molla Mehmed ve ihtiyâr ustalarından el-Hâc Mustafa ve Mustafa Usta ve İsmail Odabaşı ve Veliyüddin ve Ahmed Usta ve Hasan Usta ve es-Seyyid Hasan ve Molla Hasan ve Kundakçıbaşı Ahmed Usta ve Hâfız Süleyman ve Molla Mustafa ve sâirleri meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip hâlâ kethudâmız olan hazır bi’l-meclis Lütfullah Usta b. Ahmed umûr-ı esnâfı rü’yetde acz ve tekâsülü olmağla kethudâlıkdan bi’l-külliye keff-i yed edip esnâfımızın kudemâsından örf ve âdetimize vâkıf ve nizâm [ve] intizâmımızı mûcib olan umûr ve ahvâlimize kemâ-yenbagī ârif ve her vechile kethudâlık hizmetini idâre ve rü’yete kādir ve cümlemizin muhtârı ve mu‘temedi olan işbu bâ‘isü’l-kitâb Ahmed Usta b. Veliyüddin nâm kimesneye kasr-ı yed etmekle mezbûr el-Hâc Ahmed Usta kıbel-i şer‘den üzerimize kethudâ nasb ve ta‘yîn olunmak matlûbumuzdur deyü iltimâs etmeleriyle, hâkim-i muvakki‘-i sadr-ı kitâb[16b]‒rafe‘a kadrehû mevlâhü’l-Vehhâb‒ efendi hazretleri dahi merkūm el-Hâc Ahmed Usta’yı kethudâ nasb ve ta‘yîn ve ber-mu‘tâd-ı kadîm umûrlarını idâre ve rü’yet ve hilâf-ı şer‘-i mutahhar bir ferdi rencîde etmemek üzere tenbîh buyurduklarında, ol dahi kabûl ve ber-minvâl-i muharrer hidemât-ı lâzımesini kemâ-yenbagī mahâllinde ikāmete ta‘ahhüd etmeğin mâ-vaka‘a bi’t-taleb ketb olundu. Fî 13 Şa‘bâni’l-mu‘azzam sene [1]193. Şuhûdü’l-hâl: Mehmed Ağa Kethudâ-yı Muhzırân, İsmail Çelebi b. Ali Ser-bölük, Hasan Çelebi b. Mehmed.