İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 97 Hüküm no: 59 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Milak bt. Kigork’un Yedikule Kapısı dışındaki ekmekçi fırını ve değirmenin bir hissesini Agisa v. Manas’ya yedi yüz guruşa sattığı Mübâya‘a-i fırın Mahrûse-i Galata’ya muzâfe Ortaköy’de mütemekkine ve şahsı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Milak bt. Kigork nâm Nasrâniye meclis-i şer‘-i hatîr-i lâzımü’t-tevkīrde hâmil-i hâzihi’l-vesîka Agisa v. Manas nâm zimmî muvâcehesinde ikrâr-ı tâm ve takrîr-i kelâm edip mahmiye-i İstanbul hısnı ebvâbından Yedikule Kapısı hâricinde vâki‘ bir bâb ekmekci fırını ve ona merbût ittisâlinde [kâin] altı horoslu bir bâb değirmen derûnunda mevcûde beyne’l-hiref gedik ta‘bîr olunur yirmi dört re’s bargirden akd-i âtiyyü’z-zikrin sudûruna dek yedimde mülküm olan bir re’s bargir ile dokuz buçuk mıh ve mârrü’z-zikr bir re’s bargir ve dokuz buçuk mıha isâbet eden âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile yedi yüz guruşa mersûm Agisa zimmîye bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabûl ve semeni olan meblağ-ı mezbûr yedi yüz guruşu bana def‘ ü teslîm eylediğinde, ben dahi yedinden tamamen ve kâmilen tesellüm ve ahz ü kabz edip mebî‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsamâtdan mesfûr Agisa zimmînin zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl eyledi. Ba‘de’l-yevm benim asla ve kat‘â alâka ve medhalim kalmayup zikrolunan bir re’s bargir ve dokuz buçuk mıh ile bir re’s bargir ve dokuz buçuk mıha isâbet eden âlât-ı lâzıme-i ma‘lûme müşteri-i mesfûr Agisa zimmînin mülk-i müşterâsı olmuşdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 14 Şa‘bâni’l-mu‘azzam sene [1]193. Şuhûdü’l-hâl: Kanlıfırınlı el-Hâc Ahmed, Sayıcı Molla Osman, Yiğitbaşı Molla Ahmed, Çörekçi Molla Ahmed, Fındıklılı Mehmed Ağa.