İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 98 Hüküm no: 60 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ser-habbâzîn el-Hâc Mehmed Vakfı’na ait Davud Paşa Mahallesi’ndeki harap mekteb yerinin keşfi ve yeniden inşası için mütevelliye izin verildiği Keşf-i mekteb Husûs-ı âti’l-beyânın mahâllinde ketb ü tahrîri’çün savb-ı şer‘-i enverden irsâl olunan keşf nâibimiz müderrisîn-i kirâmdan es-Seyyid Feyzullah Efendi [ve] Hâssa mi‘mârı hulefâsından Abdullah ve Ahmed halîfeler ile İstanbul’da Davud Paşa Mahallesi’nde vâki‘ Süvâri mukābele kîsedârı Mehmed Memiş Efendi b. el-Hâc Ali’nin bağçesine varup zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî ettikde vakf-ı âti’z-zikrin mütevellîsi es-Seyyid Mehmed Zeynelabidin Efendi b. eş-Şeyh Halil Efendi meclis-i ma‘kūd-ı mezkûrda, mûmâ-ileyh Mehmed Memiş Efendi’nin li-ebeveyn er karındaşı ve tarafından vekîli Ali Bey hazır olduğu hâlde takrîr-i kelâm ve ta‘bîr ani’l-merâm edip mahalle-i mezbûrede vâki‘ ashâb-ı hayrâtdan Ser-habbâzîn el-Hâc Mehmed nâm sahibü’l-hayrın binâ eylediği mi‘mârân-ı mezbûrân misâhalarıyla tûlen ve arzen bi-hisâb-ı terbî‘î iki yüz seksen altı buçuk zirâ‘ dört parmak arsa üzerinde on dört zirâ‘ on altı parmak zukāk yüzü ve üç aded pençere ve mukābilinde üç aded pençereli mekteb-i şerîf müşrif-i harâb ve sinîn-i [17a] vâfireden beri mu‘attal kalup lâkin ta‘mîr ve tecdîde vakf-ı mezbûrda müsâ‘ade olmamağla, müvekkil-i mûmâ-ileyhin mekteb-i mezbûr vakfından ittisâlinde vâki‘ beher yevm nîm akçe icâre-i müeccele ile tasarrufunda olan bir tarafdan mekteb-i mezbûr ve bir tarafdan Meydân Kasabı Yorgaki menzili ve bir tarafdan Çukadâr Mehmed Ağa menzili ve taraf-ı râbi‘i tarîk-i âm ile mahdûd mi‘mârân-ı mezbûrân misâhalarıyla tûlen ve arzen bi-hisâb-ı terbî‘î yüz doksan beş zirâ‘ dört parmak arsalu bir bâb menzilinin ve mekteb-i şerîf-i mezbûrun bi’l-cümle harâb ebniyelerini hedm ve mekteb-i mezbûr arsasından işbu akd-i meclis olunan mülk bağçe ittisâlinde yüz doksan beş zirâ‘ dört parmak arsa ba‘de’l-ifrâz menzil-i mezkûrun icâre-i kadîme-i müeccelesi olan nîm akçe üzerine bir akçe dahi zamm ve müvekkil-i mûmâ-ileyhin bağçesine ilhâk olunmak üzere yevmî bir buçuk akçe icâre-i müeccele ile taraf-ı vakıfdan istîcâr ve münhedim olan menzil-i mezkûrun arsası üzerine mekteb-i mezbûrun enkāz-ı mevcûdesi ile masrûfât-ı sâiresini kendi mâlından harc etmek üzere mekteb-i mezbûrun hey’ât-ı kadîmesi üzere ke’l-evvel zukāk yüzü on dört zirâ‘ on altı parmak ve üç pençere ve mukābilinde üç aded pençereli kadden dört buçuk zirâ‘ müceddeden metîn ve müstahkem mekteb-i şerîf binâ murâd etmekle, ben-dahi nef‘an-li’l-vakf mekteb-i mezbûr arsasından sâlifü’z-zikr yüz doksan beş zirâ‘ dört parmak arsayı ifrâz ve vech-i meşrûh üzere beher yevm bir buçuk akçe icâre-i müeccele ile mârrü’z-zikr yüz doksan beş zirâ‘ dört parmak menzil arsası mukābilinde bi’t-tevliye müvekkil-i mûmâ-ileyhe îcâr ve teslîm, ol dahi istîcâr ve kabûl ve mekteb-i merkūmu ber-vech-i meşrûh binâ’a ta‘ahhüd ve iltizâm etmekle husûs-ı mezkûr vukūf-ı tâmmı olan zeyl-i vesîkada muharrerü’l-esâmî hâzırûn bi’l-meclis bî-garaz Müslimînden ba‘de’l-istihbâr kıbel-i şer‘den yedime hüccet-i şer‘iyye i‘tâ olunmak matlûbumdur dedikde gıbbe’s-suâl hâzırûn-ı mezbûrûn cevâblarında, fi’l-hakīka mekteb-i mezbûr menzil-i mezkûr arsası üzerine hey’ât-ı kadîmesi üzere binâ mekteb-i mezbûr arsasından müvekkil-i mûmâ-ileyhin mülk bağçesi ittisâlinde yüz doksan beş zirâ‘ dört parmak arsaya menzil-i mezkûrun icâre-i kadîmesi olan yevmî nîm akçe üzerine bir akçe dahi zamm ve yevmî bir buçuk akçe icâre-i müeccele ile müvekkil-i mûmâ-ileyhe îcâr olunmak her vechile vakf-ı şerîf-i mezbûra enfa‘ ve evlâ olduğunu her biri alâ-tarîkı’ş-şehâde haber vermeğin vâki‘ hâli mevlânâ-yı mezbûr mahâllinde ketb ü tahrîr ve ma‘an mürsel ümenâ’-i şer‘le meclis-i şer‘a gelip alâ-vukū‘ihî inhâ ve takrîr etmeleriyle hıfzan li’l-makāl işbu vesîka-i enîka bi’t-taleb ketb ve imlâ olundu. Fî 4 Şa‘bân sene 1193. Şuhûdü’l-hâl: İmâm-ı mahalle-i mezbûr Hâfız Hüseyin Efendi b. Hasan, Halil Ağa b. Mehmed, Hamza Ağa b. Ahmed, İmâm-ı sânî-i [mahalle-i] Davudpaşa Hâfız Mehmed Efendi, Ahmed Çavuş Ağa b. Mustafa, Mehmed Emin Efendi b. Ali, Abdüssamed Efendi b. Abdüssamed, Hâfız Mehmed Sâlim Efendi b. İbrahim Halîfe-i Mekteb, Molla Mustafa b. Ali.