İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 103 Hüküm no: 63 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen İbrahim Beşe b. Salih’in vârislerinin Küçükpazar’daki ekmekçi fırını ve değirmenin iki buçuk hissesini Bayram Beşe b. İlyas’a beş yüz guruşa sattıkları Mübâya‘a-i habbâz Vilâyet-i Rumeli’nde Debre kazâsında sâkin iken bundan akdem vefât eden İbrahim Beşe b. Salih’in verâseti hâlâ kazâ-i mezbûrede sâkinler anası Emine bt. Ali nâm hatuna ve li-ebeveyn Ömer-oğlu Hüseyin b. Mehmed nâm kimesne ile âhar li-ebeveyn Ömeroğulları olup İstanbul’da sâkinler olan Bayram Beşe ve diğer Hüseyin ve Süleyman ebnâ-i İlyas nâm kimesnelere münhasıra ve tashîh-i mesele-i mirasları altı sehimden olup sihâm-ı mezkûreden iki sehmi anası merkūme Emine’ye ve birer sehmi merkūmûn Hüseyin ve Bayram Beşe ve diğer Hüseyin ve Süleyman’dan herbirine isâbeti ba‘de’t-tahakkukı’ş-şer‘î mezbûr diğer Hüseyin kendiden asâleten ve merkūmûn Emine ve Hüseyin ve Süleyman taraflarından ber-vech-i câ’î bey‘ ve kabz-ı semene ve ibrâya vekîlleri olduğu mezbûre Emine’nin zâtını bi’l-ma‘rifeti’ş-şer‘iyye ârifân diğer Süleyman b. Ebûbekir ve Hasan b. Mehmed nâm kimesneler şehâdetleriyle şer‘an sâbit ve mütehakkık olmağla vekâleten meclis-i şer‘-i hatîr-i lâzımü’t-tevkīrde bâ‘is-i hâzihi’l-vesîka mezbûr Bayram Beşe mahzarında ikrâr-ı tâm takrîr-i kelâm edip mahmiye-i İstanbul’da Küçükpazar’da vâki‘ bir bâb ekmekçi fırını ve ona merbût ittisâlinde [kâin] beş horoslu bir bâb değirmen derûnunda mevcûde beyne’l-hiref gedik ta‘bîr olunur yirmi re’s bargirin iki buçuk re’si mûrisimiz müteveffâ-yı mezbûr İbrahim Beşe’nin hayatında ile’l-vefât yedinde mülkü ba‘de vefâtihî ber-vech-i tashîh-i mezkûr bizim ile merkūm Bayram Beşe’ye mevrûs olmağla, hâlâ biz vech-i muharrer üzere akd-i âtiyyü’z-zikrin sudûrune değin mülk-i mevrûsumuz olan sâlifü’z-zikr iki buçuk re’s bargirden ber-vech-i tashîh-i mezkûr benim ve müvekkillerim merkūmûnun hisse-i irsiyemize isâbet eden cem‘an beş sehm-i şâyi‘imiz ile beş sehm-i mezkûrumuza iktizâ eden âlât-ı lâzıme-i ma‘lûmemizi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile beş yüz guruşa bi’l-asâle ve bi’l-vekâle merkūm Bayram Beşe’ye bey‘ ve temlîk ve teslîm eylediğimde, ol dahi ber-minvâl-i muharrer iştirâ ve temellük ve tesellüm ve kabûl ve semeni olan meblağ-ı merkūm beş yüz guruşu bana def‘ ve teslîm eylediğinde, ben-dahi yedinden tamamen tesellüm ve ahz ü kabz edip mebî‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsemâtdan mezbûr Bayram Beşe’nin zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl eyledi. Ba‘de’l-yevm zikrolunan iki buçuk re’s bargir ile iki buçuk re’s bargire isâbet eden âlât-ı lâzıme-i ma‘lûmede benim ve müvekkillerim mezbûrûnun asla alâkamız kalmayup mezbûr Bayram Beşe’nin ırsen ve şirâen mülkü olmuşdur [19a] dedikde gıbbe’t-tasdîkı’ş-şer‘î mâ-vaka‘a bi’t-taleb ketb ve imlâ olundu. Fî 25 Ramazan sene [1]193. Şuhûdü’l-hâl: Kanlıfırınlı el-Hâc Ahmed Ağa, İsmail Ağa Kethudâ-yı Habbâzân, Yiğitbaşı Ahmed Ağa.