İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 104 Hüküm no: 64 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul kilciler esnafının kethudalığına Mustafa b. Abdullah’ın tayin edildiği Kethudâ nasbı Mahmiye-i İstanbul’da vâki‘ kilci esnâfının yiğitbaşıları Yusuf Usta ve ihtiyârlarından Süleyman ve Hüseyin ve Ali Beşe ve Osman Usta ve Hasan ve Nasuh ve Ahmed ve Mehmed Usta ve diğer Mehmed ve sâirleri meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip hâlâ kethudâmız olan hazır bi’l-meclis es-Seyyid Nebî b. Hüseyin umûr-ı esnâfı rü’yetde acz ve tekâsülü olmağla, mezbûr es-Seyyid Nebî kethudâlıkdan bi’l-külliye keff-i yed edip esnâfımızın kudemâsından örf ve âdetimize vâkıf ve nizâm ve intizâmımızı mûcib olan umûr ve ahvâlimize kemâ-yenbagī ârif ve her vechile kethudâlık hizmetini idâre ve rü’yete kādir ve cümlemizin muhtârı olan işbu bâ‘isü’l-kitâb es-Seyyid Mustafa b. Abdullah nâm kimesneye kasr-ı yed etmekle, mezbûr es-Seyyid Mustafa kıbel-i şer‘den üzerimize kethudâ nasb ve ta‘yîn olunmak matlûbumuzdur deyü iltimâs etmeleriyle, hâkim-i muvakki‘-i sadr-ı kitâb ‒rafe‘a kadrehû mevlâhü’l-Vehhâb‒ efendi hazretleri dahi merkūm es-Seyyid Mustafa’yı esnâf-ı mezbûre üzerlerine kethudâ nasb ve ta‘yîn ve ber-mu‘tâd-ı kadîm umûrlarını idâre ve rü’yet ve hilâf-ı şer‘-i mutahhar bir ferdi rencîde etmemek üzere tenbîh buyurduklarında, ol dahi kabûl ve ber-vech-i <> meşrûh hidemât-ı lâzımesini kemâ-yenbagī mahâllinde ikāmete ta‘ahhüd etmeğin mâ-vaka‘a bi’t-taleb ketb olundu. Tahrîren fi’l-yevmi’s-sâdis min-Şevval [li-]sene 1193. Şuhûdü’l-hâl: Abdullah Çelebi Kethudâ-yı Üstübciyân, Yiğitbaşı Süleyman, el-Hâc Mustafa, Mehmed Kethudâ, es-Seyyid İbrahim.