.:: İstanbul Kadı Sicilleri ::.


İstanbul Mahkemesi 44 Numaralı sicil (H. 1193-1194 / M. 1779-1780)
cilt: 78, sayfa: 105
Hüküm no: 65
Orijinal metin no: [19a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Hac yolunda olan Zeynep Hanım bt. İbrahim Paşa’nın Sepetçiler Hanı’nın nısfını Emine Hanım bt. Sârim İbrahim Paşa’ya satışında Müderris Mehmed Raşid Beyefendi’nin vekil olduğu

Mahmiye-i İstanbul’da Sipâh Pazarı mukābilinde Sepetçiler Hânı demekle ma‘rûf ma‘lûmü’l-hudûd ve’l-müştemilât Molla Husrev Efendi Vakfı müsakkafâtından beher şehir dört yüz akçe icâre-i müeccelelü bir bâb hânın nısf hissesine bir kıt‘a mütevellî temessükü nâtık olduğu üzere mutasarrıfe olan Zeynep Hanım bt. İbrahim Paşa’nın oğulları ve tarafından ber-vech-i âtî vekâlet iddi‘â eden [işbu] bâ‘isü’l-kitâb müderrisîn-i kirâmdan Mehmed Râşid Beyefendi meclis-i şer‘-i şerîf-i enverde Emine Hanım bt. Sârım İbrahim Paşa tarafından vekîl-i müseccel-i şer‘îsi müderrisîn-i kirâmdan Kâmilî Mustafa Efendi mahzarlarında ikrâr-ı tâm ve takrîr-i kelâm edip mûmâ-ileyhâ Zeynep Hanım bundan akdem Hâcc-ı şerîfe âzime olduğu hâlde mutasarrıfe olduğu mârrü’z-zikr nısf-ı hânı bedel-i misli [ve] bâ-ma‘rifet-i mütevellî âhara ferâğ ve kabz-ı bedele tarafından beni vekîl ve nâib-i menâb nasb ve ta‘yîn ettikde ben-dahi ber-vech-i muharrer vekâlet-i mezkûreyi ba‘de’l-kabûl [19b] mârrü’z-zikr nısf-ı hânı dört bin iki yüz elli guruş bedel mukābelesinde müvekkile-i mûmâ-ileyhâ Emine Hanım’a bâ-re’y-i mütevellî bi’l-vekâle ferâğ ve tefvîz etmişidim. Hâlâ bedel-i mezkûr dört bin iki yüz elli guruş müvekkile-i mûmâ-ileyhâ Emine Hanım zimmetinde kalmağla, vekîl-i mûmâ-ileyhe suâl olunup alıverilmesi matlûbumdur dedikde gıbbe’s-suâl vekîl-i mûmâ-ileyh dahi cevâbında mârrü’z-zikr nısf-ı hânı meblağ-ı mezkûr dört bin iki yüz elli guruş bedel mukābelesinde müvekkilesi mûmâ-ileyhâya bâ-re’y-i mütevellî ferâğını ikrâr lâkin müdde‘î-i mûmâ-ileyhin ber-vech-i muharrer vekâletini inkâr edicek müdde‘î-i mûmâ-ileyhin ber-vech-i muharrer vekâletine mûmâ-ileyhâ Zeynep Hanım’ın âhar oğulları Hâcegân-ı Dîvân-ı hümâyûn’dan Bursa Hocası Ahmed Rifat Beyefendi ve el-Hâc Abdurrahman b. Osman edâ’-i şehâdet-i şer‘iyye ettiklerinde gıbbe’t-ta‘dîl ve’t-tezkiye şehâdetleri makbûle olmağın mûcibiyle ba‘de’l-hükm ve’t-tenbîh mâ-vaka‘a bi’t-taleb ketb olundu.

Fî 9 Şevval sene 1193.

Şuhûdü’l-hâl: Hâcegân-ı Dîvân-ı mu‘allâdan Ahmed Rifat Beyefendi, el-Hâc Abdurrahman b. Osman, Mehmed Ağa Kethudâ-yı Muhzırân.