İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 106 Hüküm no: 67 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Yorgaki v. Mosi’nin Ayvansaraykapısı’ndaki değirmenin kiracıları Ekmekçi Abdullah Beşe b. Mustafa ve Ahmed Beşe b. Şahin ile kira bedelleri ve tamir hususlarında anlaştıkları Habbâz tâifesinden Abdullah Beşe b. Mustafa ve Ahmed Beşe b. Şahin nâm şerîkler meclis-i şer‘-i hatîr-i lâzımü’t-tevkīrde hâmil-i hâzihi’l-vesîka Kürkçü Yorgaki v. Mosi nâm zimmî muvâcehesinde her biri ikrâr-ı tâm ve takrîr-i kelâm edip mahmiye-i İstanbul’da Ayvansaraykapısı [20a] dâhilinde vâki‘ mersûm Yorgaki zimmînin altı horoslu bir bâb değirmeninde biz beher şehir otuz guruş kirâ ile ale’l-iştirâki’s-seviy müste’cirler olduğumuz ecilden mersûm Yorgaki zimmî değirmen-i mezkûr kirâsından yirmi dört ayda müctemi‘ meblağ-ı ma‘lûmü’l-mikdârdan bâkī bizden müdde‘âsı olan yüz yirmi guruş mutâlebesine müte‘allika âmme-i da‘vâdan bizim zimmetimizi ibrâ-i âm ile ibrâ ve ıskāt eylediğinde, biz dahi ibrâ-i mezkûru kabûl edip lâkin değirmen-i merkūmun ta‘mîrâtı husûsu içün mersûm Yorgaki zimmî ile ekser-i evkātda beynimizde nizâ‘ vâki‘ olmağla, kat‘an li’n-nizâ‘ fîmâ-ba‘d biz sâlifü’z-zikr otuzar guruş kirânın beher şehir tamamında yirmişer [yirmi üçer] guruşunu mersûma edâ ve teslîm mâ‘adâ yedişer guruşunu değirmen-i merkūmun küllî ta‘mîrâtından mâ‘adâ ancak döşeme ve taş ve kiremit aktarma ve sâir cüz’iyyât makūlesi meremmâtına harc ve sarf edip ziyâde mesârif talebiyle nizâ‘a tesâddî etmemek üzere rızâmız ile ta‘ahhüd eylediğimizde, mersûm Yorgaki dahi kirâ-yı merkūmun vech-i muharrer üzere mâh-be-mâh ancak yirmi üçer guruşunu ahz ve bâkī yedişer guruşunu değirmen-i mezkûrun cüz’iyyât makūlesi meremmâtına harc ve sarf etmek üzere bize emredip sâir zuhûr eden ta‘mîrât-ı küllî <> kendi etmek üzere ta‘ahhüd eyledi dediklerinde mesfûr Yorgaki zimmî dahi mukırrrân-ı mezbûrânı kelimât-ı meşrûhalarında tasdîk ve tahkīk etmeğin mâ-vaka‘a bi’t-taleb ketb olundu. Fî 16 min-Şevvali’l-mükerrem sene [1]193. Şuhûdü’l-hâl: İsmail Ağa Kethudâ-yı Habbâzân, Kanlıfırınlı el-Hâc Ahmed Ağa b. ( ), Mustafa Ağa Kethudâ-yı Uncuyân, Bedirzâde Molla Ali b. ( ), es-Seyyid Mehmed Said Ağa.