İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 107 Hüküm no: 68 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cemile Hanım bt. Ahmed’in kendisini boşayan Süleyman Bey b. Ahmed’in mehir, nafaka ve eşyalar hususundaki zimmetini ibra ettiği Mahmiye-i İstanbul’da Akbıyık Mahallesi’nde sâkine Cemile Hanım’ın babası ve tarafından husûs-ı âti’l-beyânda ber-vech-i câ’î ahz ü kabz ve ibrâya vekîl olduğu zât-ı mezbûreyi bi’l-ma‘rifeti’ş-şer‘iyye ârifân Mustafa b. Ali ve diğer Mustafa b. Abdullah nâm kimesneler şehâdetleriyle şer‘an sâbit ve mütehakkık <> ve sübût-ı vekâletine hükm-i şer‘î lâhık olan Ahmed Bey b. Mehmed nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Mehmed Süleyman Bey b. Ahmed nâm kimesne mahzarında bi’l-vekâle ikrâr-ı tâm ve takrîr-i kelâm edip mezbûr Süleyman Bey kızım müvekkilem mezbûre Cemile Hanım’ın zevc-i dâhili olup târih-i kitâbdan yetmiş dört gün mukaddem müvekkilem mezbûreyi tatlîk etmekle, müvekkilem mezbûrenin merkūm Mehmed Süleyman Bey zimmetinde mütekarrir ve ma‘kūdün-aleyh olan altı yüz guruş mehr-i mü’eccel hakkı ile nafaka-i iddet-i mu‘ayyene-i ma‘lûme ve me’ûnet-i süknâsına harc ü sarf içün bi’t-terâzî ta‘yîn olunan yüz guruş ki cem‘an yedi yüz guruşu ve ber-mûceb-i defter-i müfredât eşyâ-i ma‘lûmesini merkūm Süleyman Bey kızım müvekkilem mezbûr[e] içün bundan akdem bana def‘ ü teslîm eylediğinde, ben-dahi yedinden tamamen ve kâmilen tesellüm ve ahz ü kabz edip husûs-ı mezkûra ve ibtidâ’-i zevciyetlerinden işbu târih-i kitâba gelince sâir beynlerinde cereyân eden cemî‘ ahz ü i‘tâ ve mu‘âmelât-ı şettâda hukūk-ı ma‘lûme ve mechûleye müte‘allika âmme-i de‘âvî ve mutâlebât ve kâffe-i eymân ve muhâsamâtdan merkūm Mehmed Süleyman Bey’in zimmetini bi’l-vekâle ibrâ-i âmm-ı kātı‘ü’n-nizâ‘la ibrâ ve ıskāt eylediğimde, ol dahi ibrâ-i mezkûru kabûl eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 20 min-Şevvali’l-mükerrem sene [1]193. Şuhûdü’l-hâl: Ömer Ağa b. el-Hâc Ali, Mustafa Ağa b. Mehmed, Haffâf Mehmed Ağa b. Abdullah, Mehter Ahmed Ağa b. İbrahim.