İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 108 Hüküm no: 69 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mehmed’in boşandığı Terlikçi Mahmud Beşe b. Ahmed ile birbirlerinin zimmetlerini ibra ettikleri Mahmiye-i İstanbul’da Ayasofya-i kebîr Mahallesi’nde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Fâtıma bt. Mehmed nâm hatun meclis-i şer‘-i hatîr-i lâzımü’t-tevkīrde zevc-i muhâlı‘ı bâ‘is-i hâzihi’l-vesîka Terlikçi Mahmud Beşe b. Ahmed nâm kimesne mahzarında ikrâr-ı tâm ve takrîr-i kelâm edip merkūm Mahmud Beşe zevc-i dâhilim olup beynimizde hüsn-i mu‘âşeretimiz olmamağla, merkūmun zimmetinde mütekarrir ve ma‘kūdün-aleyh olan elli guruş mehr-i mü’eccel hakkım ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim merkūm Mahmud Beşe ile muhâla‘a-i sahîha-i şer‘iyye hul‘ olduğumda, ol dahi minvâl-i muharrer üzere hul‘-ı mezkûru ba‘de’l-kabûl hukūk-ı zevciyete ve sâire müte‘allika işbu târih-i kitâba gelince âmme-i [20b] de‘âvî ve mutâlebât ve kâffe-i eymân ve muhâsemâtdan her birimiz âharın zimmetini ibrâ-i âm ile ibrâ ve ıskāt ve her birimiz âharın ibrâsını kabûl eyledik dedikde merkūm Mahmud Beşe dahi mukırra-i mezbûre Fâtıma Hatun’u kelimât-ı meşrûhasında tasdîk ve tahkīk etmeğin mâ-vaka‘a bi’t-taleb ketb olundu. Fî 21 L sene 1193. Şuhûdü’l-hâl: Salih Beşe b. Mustafa, Salih Ağa b. Süleyman, Sarı Mehmed b. Hüseyin, Mustafa Usta b. Abdurrahman, Hüseyin Ağa b. Abdullah.