İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 108 Hüküm no: 70 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Sebzeciler Kethudası Halil Ağa b. Mehmed’in vârislerinin birbirlerinin zimmetlerini ibra ettikleri Mahmiye-i İstanbul’da Şeyhebulvefâ Mahallesi ahâlîsinden olup Vilâyet-i Anadolu’da Gerede kazâsında müsâferet vechi üzere sâkin iken bundan akdem vefât eden Sebzeciler Kethudâsı Halil Ağa b. Mehmed’in verâseti zevce-i menkûha-i metrûkesi Mahbûbe bt. Abdullah nâm hatun ile vâlidesi Meryem nâm hatuna ve li-ebeveyn karındaşları Kozbekçi Veliyüddin ve Kilârî Ali ve Ömer nâm kimesnelere münhasıra olduğu ba‘de’t-tahakkukı’ş-şer‘î mahalle-i merkūmede sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan mezbûre Mahbûbe Hatun meclis-i şer‘-i hatîr-i lâzımü’t-tevkīrde tereke-i müteveffâ-yı mezbûra bi’l-verâse vaz‘-ı yedleri mütehakkık olan bâ‘is-i hâzihi’l-vesîka mezbûrân Veliyüddin ve Ali mahzarlarında ikrâr-ı tâm ve takrîr-i kelâm edip zevcim müteveffâ-yı mezbûr Halil Ağa’nın zimmetinde mütekarrir ve ma‘kūdün-aleyh olan yüz elli guruş mehr-i mü’eccel hakkımın merkūmân Veliyüddin ve Ali bi-tar[îkı]’s-sulh tereke-i mezkûreden olmak üzere yüz guruşunu bana def‘ ve teslîm eylediklerinde, ben-dahi ber-minvâl-i muharrer yedlerinden tamamen tesellüm ve ahz ve kabz edip mâ‘adâsı olan elli guruş ile rub‘ hisse-i irsiyem mutâlebesine ve husûs-ı mirasa ve müteveffâ-yı mezbûrun kalîl ve kesîr bi’l-cümle ism-i mâl ıtlâk olunur terekesine ve hukūk-ı sâireye müte‘allika işbu târih-i kitâba gelince âmme-i de‘âvî ve mutâlebât ve kâffe-i eymân ve muhâsemâtdan ben gerek mezbûrân Veliyüddin ve Ali’nin ve gerek gāibân ani’l-beled merkūmân Meryem ve Ömer’in zimmetlerini ibrâ-i âm ile ibrâ ve ıskāt eylediğimde, mezbûrân Veliyüddin ve Ali dahi bi’l-cümle husûs-ı mezkûra ve hukūk-ı sâireye müte‘allika <<‘âmme>> târih-i merkūma gelince kezâlik âmme-i de‘âvî ve mutâlebât ve kâffe-i eymân ve muhâsamâtdan benim zimmetimi ibrâ-i âm ile ibrâ ve ıskāt edip âhar-ı tarafeyn âharın ibrâsını kabûl eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 20 min-Şevval sene 1193. Şuhûdü’l-hâl: Sâbıkā Kahvecibaşı Pehlivan Ahmed Ağa b. ( ), el-Hâc Mehmed Ağa b. ( ), İsmail Ser-bölük, es-Seyyid Osman b. es-Seyyid Hasan.