İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 109 Hüküm no: 71 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Bey b. Ahmed’in boşadığı Cemile Hanım bt. Ahmed’deki eşyalarını alıp zimmetini ibra ettiği Mahmiye-i İstanbul’da Ayasofya-i sagīr Mahallesi’nde sâkin Mehmed Süleyman Bey b. Ahmed nâm kimesne meclis-i şer‘-i hatîr-i lâzımü’t-tevkīrde zevce-i mutallakası Cemile Hanım’ın babası ve tarafından husûs-ı âti’l-beyânda ber-vech-i câ’î tasdîka vekîl olduğu zât-ı mezbûreyi bi’l-ma‘rifeti’ş-şer‘iyye ârifân Mustafa b. Ali ve diğer Mustafa b. Abdullah nâm kimesneler şehâdetleriyle şer‘an sâbit ve mütehakkık olan işbu bâ‘isü’l-kitâb Ahmed Bey b. Mehmed nâm kimesne mahzarında ikrâr-ı tâm ve takrîr-i kelâm edip müvekkile-i mezbûre Cemile Hanım zevce-i medhûlün-bihâm olup bundan akdem mezbûreyi tatlîk eylediğim esnâda emvâlim olan bir Mushaf-ı şerîf ve bir musavver kitâb ve bir elmaslı bıçak ve bir pendül sâ‘at ve incili bir yüsr tesbih ve on beş kapı perdemi bana vermeyüp yedinde kalmışidi. El-hâletü-hâzihî müvekkile-i merkūme Cemile Hanım eşyâ-i muharrere-i mezkûreyi babası vekîl-i merkūm Ahmed Bey yediyle bi-a‘yânihim bana îsâl ve teslîm eylediğinde, ben-dahi ber-minvâl-i muharrer yedinden tamamen ve kâmilen tesellüm ve ahz [21a] ü kabz edip husûs-ı mezkûra ve bi’l-cümle hukūk-ı sâireye müte‘allika işbu târih-i vesîkaya gelince âmme-i de‘âvî ve mutâlebât ve kâffe-i eymân ve muhâsemâtdan mezbûre Cemile Hanım’ın zimmetini ibrâ-i âmm-ı kātı‘ü’n-nizâ‘la ibrâ ve ıskāt eylediğimde, ol dahi ibrâ-i mezkûru kabûl eyledi dedikde vekîl-i mezbûr Ahmed Bey dahi merkūm Mehmed Süleyman Bey’i kelimât-ı meşrûhasında bi’l-vekâle tasdîk ve tahkīk etmeğin mâ-vaka‘a bi’t-taleb ketb olundu. Fî 20 min-Şevval sene [1]193. Şuhûdü’l-hâl: Mustafa Ağa Başçukadâr, Berber Mehmed Ağa, Ömer Ağa, Haffâf Mehmed Ağa, Ali Bey.