İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 110 Hüküm no: 72 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in eski damadı Nuh Efendi b. Mehmed’den alacağı olan otuz guruşu alıp zimmetini ibra ettiği Mahmiye-i İstanbul’da Koca Mustafa Paşa kurbünde Hoca Hamza Mahallesi’nde sâkine Âişe bt. Mehmed nâm hatunun hâlâ zevci ve tarafından ber-vech-i câ’î ahz ü kabz ve ibrâya vekîl olduğu zât-ı mezbûreyi bi’l-ma‘rifeti’ş-şer‘iyye ârifân el-Hâc Sadullah b. Abdullah ve Mehmed Efendi b. Abdullah nâm kimesneler şehâdetleriyle şer‘an sâbit ve mütehakkık olan Lütfullah Efendi b. Musa nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Nuh Efendi b. el-Hâc Mehmed nâm kimesne mahzarında bi’l-vekâle ikrâr-ı tâm ve takrîr-i kelâm edip mezbûr Nuh Efendi mukaddemâ dâmadımız olmak takrîbiyle kāin-vâlidesi zevcem müvekkilem mezbûrenin taht-ı tasarrufunda olan yedi bâb dükkânlarının kirâlarından bi’l-emâne makbûzu olan meblağ-ı ma‘lûmü’l-mikdârdan bi’d-defa‘ât teslîmâtından mâ‘adâ müvekkilem mezbûrenin merkūm Nuh Efendi yedinde otuz guruş hakkı bâkī kalmağla, meblağ-ı bâkī-i mezbûr otuz guruşu dahi merkūm Nuh Efendi bana def‘ ü teslîm eylediğinde, ben-dahi yedinden bi’l-vekâle tamamen tesellüm ve ahz ü kabz edip bi’l-cümle husûs-ı merkūma ve gayra müte‘allika târih-i kitâba gelince âmme-i de‘âvî ve mutâlebât ve kâffe-i eymân ve muhâsamâtdan merkūm Nuh Efendi’nin zimmetini ibrâ-i âm ile bi’l-vekâle ibrâ ve ıskāt eylediğimde, ol dahi ibrâ-i mezkûru kabûl eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 28 min-Şevval sene [1]193. Şuhûdü’l-hâl: el-Hâc Sadullah b. Abdullah, Mehmed Efendi b. Abdullah, İsmail Çelebi b. Ali.