İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 110 Hüküm no: 73 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Ayşe bt. Abdullah’ın vârislerinin beş sene önce ölümüne sebep olmakla itham ettikleri Ahmed Efendi b. Mustafa’ya açtıkları davadan kendi rızalarıyla bedelsiz vazgeçip zimmetini ibra ettikleri Mahrûse-i Galata’ya muzâfe Kasaba-i Kasımpaşa’da Tahtakādı Mahallesi’nde sâkine iken bundan akdem vefât eden Âişe bt. Abdullah’ın verâseti zevc-i metrûkü Yahya Beşe b. Hüseyin nâm kimesne ile vâlidesi Hadîce bt. Abdurrahman nâm hatuna ve sadrî kebîr oğlu Mehmed b. Mustafa Halîfe nâm kimesneye inhisârı tahakkukdan sonra mezbûr Yahya Beşe meclis-i şer‘-i hatîr-i lâzımü’t-tevkīrde işbu bâ‘isü’l-kitâb Ahmed Efendi b. Mustafa nâm kimesne mahzarında ikrâr-ı tâm ve takrîr-i kelâm edip târih-i kitâbdan beş sene mukaddem zevcem müteveffât-ı mezbûrenin benim firâşımdan hâsıl hamli olmağla, mezbûr Ahmed Efendi müteveffât-ı mezbûrenin hayatında bi-gayr-ı hakkın üzerine hücûm ve sayha edip havfından nâşî iki gün mürûrunda mezbûre Âişe müstebînü’l-hılka bir cenîn veled-i zeker-i hayy ilkā ve fi’l-hâl vefât etmekle mûceb-i şer‘îsini bundan akdem mezbûr Ahmed Efendi’den taleb ve da‘vâya tesâddî etmişidim. El-hâletü-hâzihî da‘vâ-yı mezkûremden rızâm ile meccânen fâriğ olup husûs-ı mezkûra ve sâire müte‘allika târih-i kitâba gelince âmme-i de‘âvî ve mutâlebât ve kâffe-i eymân ve muhâsamâtdan mezbûr Ahmed Efendi’nin zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl eyledi dedikde gıbbe’t-tasdîkı’ş-şer‘î merkūm Mehmed kendiden asâleten ve min-kıbeli’l-ümm ceddesi merkūme Hadîce tarafından ibrâya vekîl olduğu zât-ı mezbûreyi bi’l-ma‘rifeti’ş-şer‘iyye ârifân Hasan Ağa b. Halil ve diğer Hasan Ağa b. Ömer nâm kimesneler şehâdetleriyle şer‘an sâbit ve mütehakkık <> olmağla vekâleten meclis-i şer‘-i münîrde merkūm Ahmed Efendi mahzarında ikrâr-ı tâm ve takrîr-i kelâm edip bâlâda tafsîl ve beyân olunduğu husûsu bundan akdem ben mezbûr Ahmed Efendi’den taleb ve da‘vâya tesâddî etmişidim. El-hâletü-hâzihî da‘vâ-yı mezkûremden rızâm ile meccânen fâriğ olup husûs-ı merkūma ve sâire müte‘allika âmme-i de‘âvî ve mutâlebât ve kâffe-i eymân [21b] ve muhâsamâtdan mezbûr Ahmed Efendi’nin zimmetini bi’l-asâle ve bi’l-vekâle ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl eyledi dedikde mezbûr Ahmed Efendi dahi mezbûr Mehmed’i kelimât-ı meşrûhasında tasdîk ve tahkīk etmeğin mâ-vaka‘a bi’t-taleb ketb olundu. Fî 23 min-Şevval sene [1]193. Şuhûdü’l-hâl: Müderrisîn-i kirâmdan İsmail Efendi, Mahtûmîzâde Abdurrahman Efendi b. el-Hâc Ahmed Efendi, Abdullah b. Süleyman, Müezzin Abdurrahman Efendi b. el-Hâc Hasan, Halil Efendi b. Ahmed.