İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 111 Hüküm no: 74 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mustafa Halîfe’nin babasının alacaklı olduğu Ahmed Efendi b. Mustafa ile yüz elli guruş üzerine sulh oldukları Mahrûse-i Galata’ya muzâfe Kasaba-i Kasımpaşa’da Tahtakādı Mahallesi’nde sâkin Mehmed nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Ahmed Efendi b. Mustafa nâm kimesne mahzarında ikrâr-ı tâm ve takrîr-i kelâm edip bundan akdem vefât eden babam Mustafa Halîfe b. Ömer hayatında gāibetü ani’l-meclis Rukiye Hanım bt. Şehrî İsmail Efendi’nin yedinden bin yüz yirmi guruş istikrâz ve kabz ve mukābelesinde mahalle-i merkūmede vâki‘ bir bâb mülk menzil ve ittisâlinde kâin bir mülk bostanını gāibe-i mezbûreye bi-tarîkı’l-vefâ rehin vaz‘ ve teslîm ettikden sonra babam mezbûr Mustafa Halîfe vefât etmekle babam mezbûrun vefâtından sonra vefât eden anam Âişe nâm hatun benim mal-ı mevrûsumda olmak üzere iznim ile deyn-i mezkûrun dört yüz elli guruşunu gāibe-i mezbûreye ver deyü mezbûr Ahmed Efendi’ye teslîm, ol dahi tesellüm ve ahz edip lâkin meblağ-ı mezbûr dört yüz elli guruşu gāibe-i mezbûre Rukiye Hanım’a vermeyüp yedinde kalmağla meblağ-ı mezbûru bundan akdem ben merkūm Ahmed Efendi’den taleb ve da‘vâ eylediğimde, ol dahi inkâr etmekle beynimizde münâza‘ât-ı kesîre ve muhâsamât-ı şedîde cereyân etmişidi. El-hâletü-hâzihî beynimize muslihûn tavassut edip da‘vâ-yı mezkûremden beni merkūm Ahmed Efendi ile yüz elli guruş üzerine ber-nehc-i şer‘î sulh eylediklerinde, ben dahi sulh-i mezbûru ba‘de’l-kabûl mezbûr Ahmed Efendi bedel-i sulh-ı merkūm yüz elli guruşu bana def‘ ü teslîm eylediğinde, ben dahi yedinden tamamen ve kâmilen tesellüm ve ahz ü kabz edip mâ‘adâsına ve bi’l-cümle husûs-ı merkūma ve hukūk-ı sâireye müte‘allika <<‘âmme>> işbu târih-i kitâba gelince âmme-i de‘âvî ve mutâlebât ve kâffe-i eymân ve muhâsamâtdan gerek mezbûr Ahmed Efendi’nin ve gerek gāibe-i merkūme Rukiye Hanım’ın zimmetlerini ibrâ-i âm ile ibrâ ve ıskāt eylediğimde, ol dahi ibrâ-i mezkûru kabûl eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 23 L sene [1]193. Şuhûdü’l-hâl: Şâhidûne’s-sâbıkūn.