İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 112 Hüküm no: 75 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agop v. Kasber’in Hasanpaşa Hanı yakınındaki ekmekçi fırını hamur tahtasının Ohan v. Vartan’ın satın alınmış malı olduğunu kabul ettiği Mahmiye-i İstanbul’da Kumkapı dâhilinde mütemekkin Agop v. Kasber zimmî meclis-i şer‘-i hatîr-i lâzımü’t-tevkīrde mahmiye-i merkūmede Hasan Paşa Hânı kurbünde vâki‘ habbâz fırını ustası hâmil-i hâzih’l-vesîka Ohan v. Vartan nâm zimmî muvâcehesinde ikrâr-ı tâm ve takrîr-i kelâm edip fırın-ı mezkûrun müştemilâtından olan Simkeşhâne’ye muttasıl ekmekçi pîsgônisinde mersûm Ohan zimmînin beyâ‘ı olup bundan akdem hâlik olan Mardiros v. Aritun nâm zimmînin veresesi sâlifü’z-zikr pîşgôni hâlik-i mersûmdan mevrûs mülkümüzdür deyü semen-i ma‘lûm ve makbûza bana bey‘ ve temlîk ben-dahi ber-vech-i muharrer yedlerinden iştirâ ve temellük ve kabûl eylediğimden sonra zikrolunan pîşgôniyi zabtetmek murâd eylediğimde, zey-i vesîkada mastûrü’l-esâmî hâzırûn bi’l-meclis habbâzân kethudâsı ve yiğitbaşıları ve bi’l-cümle nizâm ustaları hâlik-i mesfûr Mardiros zimmînin asla alâka ve medhali olmayup zikrolunan pîşgôni mersûm Ohan zimmînin fırın-ı mezkûru müştemilâtından olmağla fırın-ı merkūma mutasarrıf olanlar mârrü’z-zikr pîşgôniye mutasarrıf olagelmişlerdir deyü bi’l-ittfâk muvâcehemde bana ihbâr etmeleriyle, ben-dahi hâlik-i mesfûr Mardiros[‘un] mesfûr Ohan zimmînin beyâ‘ı olup zikrolunan pîşgônide vechen mine’l-vücûh alâka ve medhali olmadığı yakīnen ma‘lûmum olmağla zikrolunan pîşgôni mutâlebesinden keff-i yed eyledim. Ba‘de’l-yevm [22a] husûs-ı mezkûra müte‘allika mesfûr Ohan zimmî ile asla ve kat‘â da‘vâ ve nizâ‘ım ve husûmetim yokdur dedikde mesfûr Ohan zimmî dahi mukırr-ı mersûm Agop zimmîyi kelimât-ı meşrûhasında tasdîk ve tahkīk etmeğin mâ-vaka‘a bi’t-taleb ketb olundu. Fî 3 min-Zilka‘de sene [1]193. Şuhûdü’l-hâl: Habbâzân Kethudâsı İsmail Ağa, Yiğitbaşı Ahmed Ağa b. ( ), Sayıcı Osman Ağa b. ( ), es-Seyyid Mehmed Said Ağa b. el-Hâc İsmail, Kanlıfırınlı el-Hâc Ahmed Ağa.