İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 113 Hüküm no: 76 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Mehmed ve Müzlimşah bt. Abdullah’ın Üsküdar Uncular Sokağı’ndaki değirmen ve ekmek fırınını işleten Ekmekçi Aleksan v. Mıgırdıç ile kira bedeli, yeniden kiralama ve tamir hususunda anlaştıkları Mahmiye-i İstanbul’da Kumkapı dâhilinde Tavaşî Süleyman Ağa Mahallesi’nde sâkin Mustafa Ağa b. Mehmed nâm kimesne kendiden asâleten ve Müzlimşâh bt. Abdullah nâm hatun tarafından husûs-ı âti’l-beyânda ber-vech-i câ’î [ibrâya] vekîl olduğu es-Seyyid Mehmed Said Ağa b. es-Seyyid el-Hâc Mustafa ve Ahmed Ağa b. el-Hâc Mustafa nâm kimesneler şehâdetleriyle şer‘an sâbit ve mütehakkık olmağla vekâleten meclis-i şer‘-i hatîr-i lâzımü’t-tevkīrde hâmil-i hâzihi’l-vesîka Ekmekçi Aleksan v. Mıgırdıç nâm zimmî muvâcehesinde ikrâr-ı tâm ve takrîr-i kelâm edip medîne-i Üsküdar’da Uncular zukāğında vâki‘ iki horoslu bir bâb değirmen ve ittisâlinde [kâin] bir bâb habbâz fırınının dört sehim i‘tibâriyle üçer sehmi benim ve birer sehmi müvekkilem mezbûre Muzlimşah hatunun taht-ı tasarrufumuzda olup zikrolunan fırın ve değirmende mersûm Aleksan zimmî beher şehir on ikişer buçuk guruş kirâ ile müste’cirimiz olmağla işbu târih-i kitâba gelince yirmi altı ayda müctemi‘ mersûmun zimmetinde hakkımız olan üç yüz yirmi beş guruş mutâlebesine müte‘allika âmme-i da‘vâdan ben bi’l-asâle ve bi’l-vekâle mersûm Aleksan zimmînin zimmetini ibrâ-i âm ile ibrâ ve ıskāt eylediğimde, ol dahi ibrâ-i mezkûru ba‘de’l-kabûl sâlifü’z-zikr fırın ve değirmeni târih-i kitâbdan beher şehir on ikişer buçuk kirâ kavliyle bi’l-asâle ve bi’l-vekâle yine mersûm Aleksan zimmîye îcâr ve teslîm eylediğimde, ol dahi ber-minvâl-i muharrer istîcâr ve tesellüm ve kabûl eyledi dedikde gıbbe’t-tasdîkı’ş-şer‘î mesfûr Aleksan zimmî sâlifü’z-zikr fırın ve değirmenin fîmâ-ba‘d zuhûr eden cüz’î ve küllî ta‘mîrâtına kendi mâlından harc ve sarf edip gerek mezbûr Mustafa Ağa’dan ve gerek müvekkile-i mezbûre Muzlimşah Hatun’dan bir akçe ve bir habbe taleb etmeyüp ve zikrolunan fırın ve değirmeni mu‘attal etmemek üzere ta‘ahhüd etmeğin mâ-vaka‘a bi’t-taleb ketb olundu. Fî 7 min-Zilka‘de sene [1]193. Şuhûdü’l-hâl: eş-Şâhidûne’s-sâbıkūn.