İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 118 Hüküm no: 82 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçiler Abram v. Minas, Mesail v. Zarok ve Semaven v. Kazer’in Kırkçeşme yakınındaki ekmek fırını ve değirmenlerinin yedi hissesini Barsam v. Avanes’e bin elli guruşa sattıkları Habbâz tâifesinden Abram v. Minas ve Mesail v. Zarok ve Semaven v. Kazer nâm şerîkler meclis-i şer‘-i hatîr-i lâzımü’t-tevkīrde hâmil-i hâzihi’l-vesîka Barsam v. Avanes nâm zimmî muvâcehesinde her biri ikrâr-ı tâm ve takrîr-i kelâm edip mahmiye-i İstanbul’da Kırkçeşme kurbünde vâki‘ bir bâb habbâz fırını ve ona merbût ittisâlinde [kâin] altı horoslu bir bâb değirmen derûnunda mevcûde yirmi dört re’s bargir ve yine fırın-ı mezkûr ittisâlinde kâin üç horoslu bir bâb uncu değirmeni derûnunda mevcûde on iki re’s bargir ki beyne’l-hiref gedik ta‘bîr olunur akd-i âti’z-zikrin sudûruna dek ale’l-iştirâki’s-seviy yedimizde mülkümüz olan cem‘an otuz altı re’s bargirin her bir re’si yüz ellişer guruşa olmak üzere yedi re’s bargir ile yedi re’s bargire isâbet eden âlât-ı lâzıme-i ma‘lûmemizi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bin elli guruşa mersûm Barsam zimmîye bey‘ ve temlîk ve teslîm eylediğimizde, ol dahi ber-vech-i muharrer iştirâ ve temellük ve tesellüm ve kabûl ve semeni olan meblağ-ı mezbûr bin elli guruşu bize def‘ ü teslîm eylediğinde, biz-dahi yedinden tamamen tesellüm ve ahz ü kabz edip mebî‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve mutâlebât ve kâffe-i eymân ve muhâsemâtdan mersûm Barsam zimmînin zimmetini ibrâ-i âm ile ibrâ ve ıskāt eylediğimizde, ol dahi ibrâ-i mezkûru kabûl eyledi. Ba‘de’l-yevm sâlifü’z-zikr yedi re’s bargir ve yedi re’s bargire isâbet eden âlât-ı lâzıme-i ma‘lûmede bizim alâka ve medhalimiz kalmayup müşteri-i mersûm Barsam zimmînin mülk-i müşterâsı olmuşdur dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 Zilka‘de sene [1]193. Şuhûdü’l-hâl: Şâhidûne’s-sâbıkūn.