İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 126 Hüküm no: 90 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahak v. Çolak Mikail’in Makrahora köyündeki ekmekçi fırını gediğini Toma ve Sahak v. Kirkor kardeşlere yedi yüz guruşa sattığı Mahmiye-i İstanbul’da Mesîh Ali Paşa Mahallesi’nde mütemekkin Sahak v. Çolak Mikail nâm zimmî tarafından husûs-ı âti’l-beyânda ber-vech-i câ’î bey‘ ve kabz-ı semene vekîl olduğu Ahmed b. el-Hâc Mustafa nâm kimesne ile Bedros v. Begos nâm zimmî şehâdetleriyle şer‘an sâbit ve mütehakkık olan Serkiz v. Aleksan nâm zimmî meclis-i şer‘-i hatîr-i lâzımü’t-tevkīrde kendiden asıl ve li-ebeveyn karındaşı Toma v. Kirkor nâm zimmî tarafından ber-vech-i âtî tasdîka vekîl-i şer‘îsi olan bâ‘is-i hâze’l-vesîka Mirâhurlı diğer Sahak zimmî muvâcehesinde bi’l-vekâle ikrâr-ı tâm ve takrîr-i kelâm edip Havâss-ı refî‘a kazâsına tâbi‘ Makrahora karyesinde vâki‘ merhûm Şa‘bân Ağa musakkafâtından ma‘lûmü’l-hudûd bir bâb habbâz fırını derûnunda mevcûde beyne’l-hiref gedik ta‘bîr olunur bir hamîr teknesi ve altmış aded panakop ve bir bakır kazgan ve bir demir fırın kapağı ve bir destgâh ve dört göz dolab ve iki elek ve bir çift kutu ve bir demir kürek ve altı ağaç kürek ve iki sandık ve iki kantar ve iki terâzi ve iki takım derâhim ve iki tuz eleği ve bir re’s bargir ve sâir âlât-ı lâzıme-i ma‘lûmede müvekkilim mesfûr Sahak zimmînin akd-i âtiyyü’z-zikrin sudûrune dek yedinde mülkü olan nısf hisse-i şâyi‘asını tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile yediyüz guruşa mersûmân Toma ve diğer Sahak zimmîlere ale’l-iştirâki’s-seviy bi’l-vekâle bey‘ ve temlîk ve teslîm eylediğimde, onlar dahi ber-vech-i muharrer [26b] iştirâ ve temellük ve tesellüm ve kabûl ve semeni olan meblağ-ı mezbûr yedi yüz guruşu bana def‘ ü teslîm eylediklerinde, ben-dahi bi’l-vekâle yedlerinden tamamen tesellüm ve ahz ü kabz eyledim. Ba‘de’l-yevm müvekkilim mesfûr Sahak zimmînin asla alâka ve medhali kalmayup âlât-ı mezkûrede olan nısf hisse-i şâyi‘ası müşteriyân-ı mersûmân Toma ve diğer Sahak zimmîlerin ale’l-iştirâki’s-seviy mülk-i müşterâları olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 Muharrem sene [1]194. Şuhûdü’l-hâl: Habbâzân Kethudâsı İsmail, Kanlıfırınlı el-Hâc Ahmed Ağa b. ( ), Uncular Kethudâsı Mustafa, es-Seyyid Mehmed Said Ağa.