İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 128 Hüküm no: 92 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koca Mustafa Paşa Camii Vakıfları’na ait iki fodula fırınını tamir ve tecdid ettiren mütevellî için keşif ve masraf tahmin vesikası Bâ-mühr-i muhâsebeci efendi Mahmiye-i İstanbul’da merhûm Koca Mustafa Paşa Câmi‘-i şerîfi Evkāfı’nın mütevellîsi olan fahrü’l-emsâl Ahmed Ağa b. ( ) nâm kimesne meclis-i şer‘-i şerîf-i enverde bast-ı merâm ve takrîr-i kelâm edip mütevellîsi olduğum [27a] merhûm-ı müşârün-ileyhin imâret-i âmirelerinde fodula tabh olunan iki aded fırınlar müşrif-i harâb olup ta‘mîr ve tecdîde eşedd-i ihtiyâc ile muhtâc olduğu lede’ş-şer‘i’l-enverde müte‘ayyen ve yedimde olan mal-ı vakıf ile ta‘mîr ve tecdîde mâdûniyyetim hasebiyle zikrolunan fırınları ta‘mîr ve tecdîd ve tekmîl etmişidim. Kıbel-i şer‘-i enverden üzerine varılup keşf ve tahmîn ve masrûfum takvîm ve yedime vesîka-i şer‘iyye i‘tâ olunmak matlûbumdur dedikde kıbel-i şer‘-i kavîmden keşif nâibi müderrisîn-i kirâmdan Necibzâde es-Seyyid Feyzullah Efendi Hâssa mi‘mârlarından Başhalîfe Mehmed ve es-Seyyid İbrahim halîfeler ile fırın-ı mezkûra varup merhûm-ı müşârün-ileyh âsitânesinde şeyh olan es-Seyyid Mehmed Hâşim Efendi ve sâir cemâ‘at-i Müslimîn ile keşf ve nazar eylediklerinde, hâl mütevellî-i mûmâ-ileyhin takrîr-i meşrûhu üzere olmağın mi‘mârân-ı mezbûrân ve sâir umûr-ı binâya vukūf-ı tâmmı olan ehl-i hibre ile zikrolunan iki fırınların ta‘mîr ve tecdîd olunan mahallerini misâha ve takvîm ve tahmîn-i sahîh ile tahmîn ve defter ve fiyât-ı cârîsini vaz‘ ile defter-i merkūm yekûnunu yalnız altı yüz seksen iki guruş on sekiz akçeye iblâğ ve meblağ-ı merkūm altı yüz seksen iki guruş on sekiz akçe ile ancak vücûda gelür noksan ile mümkün değildir deyü mi‘mârân-ı mezbûrân Müslimîn-i merkūmûn ile icmâ‘ ve ittifâk eylediklerini, mevlânâ-yı mezbûr mahâllinde ketb ü tahrîr ma‘an meb‘ûs ümenâ’-i şer‘le meclis-i şer‘a gelüp alâ-vukū‘ihî inhâ ve takrîr etmeğin mûcebile meblağ-ı merkūm altı yüz seksen iki guruş on sekiz akçe mütevellî-i mûmâ-ileyhin hesâbına mahsûb olmak üzere işbu vesîka mâ-hüve’l-vâki‘ bi’t-taleb ketb ü imlâ olundu. Fî 29 Muharrem sene [1]194. Şuhûdü’l-hâl: Mefharü’l-meşâyihi’l-kirâm es-Seyyid Mehmed Hâşim Efendi Post-nişîn-i hânkāh-ı merkūm, Ahmed Efendi b. Süleyman, Osman Ağa b. Mahmud, Molla Ali b. Abdullah.