İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 129 Hüküm no: 93 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Agop v. Parnik’in Mercan Çarşısı’ndaki ekmek fırını ve değirmenin yirmi yedi hissesini Begoz ve Markar v. Avanes kardeşlere üç bin üç yüz yetmiş beş guruşa sattığı Habbâz tâifesinden Agop v. Parnik nâm zimmînin sulbî kebîr oğlu ve tarafından husûs-ı âti’l-beyânda ber-vech-i câ’î ikrâra vekîl olduğu Atanaş v. Artin ve Haçador v. Karabet nâm zimmîler şehâdetleriyle şer‘an sâbit ve mütehakkık olan Mardiros nâm zimmî meclis-i şer‘-i hatîr-i lâzımü’t-tevkīrde bâ‘is-i hâzihi’l-vesîka Begoz ve Markar veledey Avanes nâm karındaşlar muvâcehelerinde bi’l-vekâle ikrâr-ı tâm ve takrîr-i kelâm edip mahmiye-i İstanbul’da Mercan sûkunda vâki‘ bir bâb ekmekçi fırını ve ona merbût ittisâlinde kâin dokuz horoslu bir bâb değirmen derûnunda mevcûde beyne’l-esnâf gedik ta‘bîr olunur otuz altı re’s bargirin yirmi yedi re’si babam müvekkilim mesfûr Agop’un ve dokuz re’si mersûmân Begoz ve Markar zimmîlerin ale’l-iştirâk yedlerinde mülkleri olmağla, babam müvekkilim mersûm Agop akd-i âtiyyü’z-zikrin sudûruna dek yedinde mülkü olan sâlifü’z-zikr yirmi yedi re’s bargiri [ve] yirmi yedi re’s bargire isâbet eden âlât-ı lâzıme-i ma‘lûmesini [27b] tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile her bir re’s bargiri yüz yirmi beşer guruşa olmak üzere cem‘an üç bin üç yüz yetmiş beş guruşa mersûmân Begoz ve Markar zimmîlere ale’l-iştirâki’s-seviy bey‘ ve temlîk ve teslîm eylediğinde, onlar dahi ber-vech-i muharrer iştirâ ve temellük ve tesellüm ve kabûl ve semeni olan meblağ-ı mezbûr üç bin üç yüz yetmiş beş guruş ile zikrolunan fırın ve değirmenin sermâye ve fâizi ve zimemlerinden ba‘de külli’l-hesâb hisse-i ma‘lûmesini babam müvekkilim mesfûr Agop zimmîye def‘ ve teslîm eylediklerinde, ol dahi yedlerinden tamamen tesellüm ve ahz ü kabz edip mebî‘-i mezkûrun tağrîr ve gabnine ve bi’l-cümle husûs-ı mezkûra müte‘allika âmme-i de‘âvî ve mutâlebât ve kâffe-i eymân ve muhâsamâtdan mersûmân Begoz ve Markar zimmîlerin zimmetlerini ibrâ-i âm ile ibrâ ve ıskāt eylediğinde, onlar dahi ibrâ-i mezkûru kabûl eylediler. Ba‘de’l-yevm zikrolunan yirmi yedi re’s bargire isâbet eden âlât-ı lâzıme-i ma‘lûme müşteriyân-ı mersûmân Begoz ve Markar zimmîlerin ale’l-iştirâki’s-seviy mülk-i müşterâları olup babam müvekkilim mesfûr Agop zimmînin asla ve kat‘â alâka ve medhali kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 2 min-Safer sene [1]194. Şuhûdü’l-hâl: Habbâzân Kethudâsı İsmail Ağa, Kanlıfırınlı el-Hâc Ahmed Ağa, Yiğitbaşı Ahmed Ağa, Sayıcı Molla Osman, Usta Mikail, Usta Vartan, Usta Serkiz, Usta Filibos, Pelav-oğlu Abram.