İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 130 Hüküm no: 94 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahpaşa Vakfı’na ait Çerağî Hamza Mahallesi’ndeki menzilin tevliyetinin vâkıfenin evladı kalmadığından mahalle müezzini Ahmed Efendi b. Mehmed’e tevcih edildiği Mahmiye-i İstanbul’da Koca Mustafa Paşa kurbünde Çerâğī Hamza Mahallesi’nde vâki‘ bir tarafdan imâma meşrûta menzil ve bir tarafdan Enbiyâ bostanı demekle ma‘rûf bostan ve bir tarafdan es-Seyyid Abdülcelil Efendi menzili ve bir tarafdan tarîk-i âm ile mahdûd [ve] ma‘lûmü’l-müştemilât bir bâb menzili Şâhpaşa nâm sahibetü’l-hayr hayatında mülkünde olduğu hâlde vakf ve süknâ ve tevliyetini evlâdına ve evlâd-ı evlâdına ve evlâd-ı evlâd-ı evlâdına ba‘de’l-inkırâz re’y-i hâkimü’ş-şer‘ile ahâlî-i mahalleden bir recül kimesneye tevcîh olunup, ol recül dahi menzil-i mezkûru icâre-i mu‘accele ve beher şehir on beşer akçe icâre-i müeccele ile âhara îcâr edip mu‘accele ve müeccelesini kabz ve mukābelesinde beher yevm birer Yâsin-i şerîf tilâvet ve sevâbını vâkıfe-i mezbûrenin rûhuna ihdâ etmek üzere şart ve ta‘yîn etmekle, vâkıfe-i mezbûrenin evlâdı bi’l-külliye münkariz olduğuna binâen bin yüz kırk yedi senesi Muharremi’l-harâm’ının on altıncı günü târihiyle müverrah bir kıt‘a hüccet mantûkunca menzil-i merkūmun tevcîh-i hâkimü’ş-şer‘le mütevellîsi olan Mehmed Ağa b. Salih nâm kimesne bundan akdem fevt olup yeri hâlî ve hizmet-i lâzımesi mu‘attal kalmağla, ber-mûceb-i şart-ı vâkıfe müteveffâ-yı mezbûrun yerine kıbel-i şerî‘at-i garrâdan bir mütevellî nasbı lâzım ve mühim olmağın, hâkim-i muvakkı‘-ı sadr-ı kitâb bi-tevkī‘ihi’r-refî‘ü’l-müstetâb ‒tûbâ-lehû ve hüsnü-meâb‒ efendi hazretleri dahi hâlâ menzil-i mezkûrun bir kıt‘a mütevellî temessükü mantûkunca bi’l-icâreteyn-i müstakille mutasarrıfesi olan Emine bt. Nasuh nâm hatun hâzıra olduğu hâlde tevliyet-i [28a] mezkûreyi muhtâr-ı ahâlî-i merkūmeden olup tevliyet-i mezkûre uhdesinden gelmeğe kādir idüği ihbâr olunan işbu bâ‘isü’l-kitâb mahalle-i mezbûre müezzini Ahmed Efendi b. Mehmed nâm kimesneye tevcîh buyurduklarında, ol dahi kabûl ve hizmet-i lâzımesini kemâ-yenbagī edâya ta‘ahhüd ve iltizâm etmeğin mâ-hüve’l-vâki‘ bi’t-taleb ve’l-ibtigā ketb ve imlâ olundu. Hurrire fi’l-yevmi’s-sâmin aşere min-Saferü’l-hayr li-sene erba‘a ve tis‘în ve mie ve elf. Şuhûdü’l-hâl: Mehmed Ağa b. Ahmed Kethudâ-yı Muhzırân, İsmail Çelebi b. Ali, Kemahlı Muhzır İbrahim, el-Hâc Mustafa b. Hasan, Abdurrahman Efendi, Mehmed Emin b. el-Hâc Mustafa Muhzır-ı Muhâsebe, Molla Mehmed b. el-Hâc Ahmed, Molla Hasan b. Mehmed.