İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 131 Hüküm no: 95 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Latife bt. Abdullah’ın kocası Kadı Mehmed Efendi b. Ahmed’in vekilen tahsil ettiği gelirleri olan toplam beş bin iki yüz kırk iki guruşu kendisinden teslim aldığı ve zimmetini ibra ettiği Mahmiye-i İstanbul’da Mesîh Hasan Paşa Mahallesi’nde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Latîfe bt. Abdullah nâm hatun meclis-i şer‘-i hatîr-i lâzımü’t-tevkīrde hâlâ zevci bâ‘isü’l-vesîka mefharu’l-kuzât el-Hâc Mehmed Efendi b. Ahmed nâm kimesne mahzarında ikrâr-ı tâm ve takrîr-i kelâm edip mezbûr el-Hâc Mehmed Efendi bundan akdem izin ve tevkîlim ile kabz eylediği hân semeninden dokuz yüz guruş ve ma‘lûmü’l-vezn altın bilezik semeninden yedi yüz elli guruş ve Ali Paşa Hamamı’ndan bin kırk guruş ve Kuyumcu Avadik zimmîden beş yüz guruş ve bir re’s tavâşî semeninden beş yüz guruş ve câriyeler semenlerinden bin beş yüz guruş ki benim mâlım olmak üzere makbûzu olan cem‘an beş bin iki yüz kırk guruş ile akārâtım kirâlarından cem‘ ü tahsîl ve ahz ü kabz eylediği meblağ-ı ma‘lûmü’l-mikdârı mezbûr el-Hâc Mehmed Efendi ceste ceste bana edâ ve teslîm eylediğinde, ben-dahi ber-minvâl-i muharrer yedinden tamamen tesellüm ve ahz ü kabz etmişidim. El-hâletü-hâzihî zikrolunan husûslara ve sâir beynimizde cereyân eden cemî‘ ahz ü i‘tâ ve mu‘amelât-ı şettâdan hukūk-ı ma‘lûme ve mechûleye müte‘allika işbu târih-i kitâba gelince âmme-i de‘âvî ve mutâlebât ve kâffe-i eymân ve muhâsamâtdan mezbûr el-Hâc Mehmed Efendi’nin zimmetini ibrâ-i âmm-ı kātı‘ü’n-nizâ ile ibrâ ve ıskāt eylediğimde, ol dahi ibrâ-i mezkûru kabûl eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 12 Safer sene [1]194. Şuhûdü’l-hâl: Umdetü’l-müderrisîni’l-kirâm zübdetü’l-mehâdîmü’l-fihâm fazîletlü Mehmed Ârif Efendi hazretleri, Fahrü’l-müderrisîni’l-kirâm Mehmed Emin Efendi, Fahrü’l-kuzât Mahtûmîzâde Abdurrahman Efendi, Abdurrahman Efendi b. el-Hâc Mustafa, Mehmed Ârif Efendi b. el-Hâc Ali Kâtib-i evvel-i muhâsebe, Mehmed Emin Ağa b. el-Hâc Mustafa Muhzır-ı muhâsebe.