İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 131 Hüküm no: 96 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Hüseyin’in daha önce gediğini kendisine sattığı Sultan Bâyezid Camii yakınındaki bakkal dükkânındaki sermaye elli bin akçeyi kızı Hafize’den aldığı Bakkāl Mahmiye-i İstanbul’da Atpazarı kurbünde Hüsam Bey Mahallesi’nde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Fâtıma bt. el-Hâc Hüseyin nâm hatun meclis-i şer‘-i hatîr-i lâzımü’t-tevkīrde sadriye kebîre kızı bâ‘isetü hâzihi’l-vesîka Hafîze bt. el-Hâc Hasan nâm hatunun hâlâ zevci ve tarafından husûs-ı âti’l-beyânda ber-vech-i câ’î tasdîka vekîl-i [28b] şer‘îsi Hâfız el-Hâc Mehmed Ağa b. el-Hâc Hasan nâm kimesne mahzarında ikrâr-ı tâm ve takrîr-i kelâm edip mahmiye-i mezbûrede Sultân Bâyezid Câmi‘-i şerîfi kurbünde Buğdaycılar Kapısı hâricinde vâki‘ Solak dükkânı demekle ma‘lûm bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeyi yedimde mülküm iken işbu bir kıt‘a memhûr temessük nâtık olduğu vech üzere bin yüz seksen iki Recebi’l-ferdi’nin on birinci günü târihinde kızım müvekkile-i merkūme Hafîze Hatun’a safka-i vâhide ile beş yüz guruş semen-i medfû‘ ve makbûza bey‘ ve temlîk ve teslîm eylediğimde, ol dahi ber-minvâl-i muharrer iştirâ ve temellük ve tesellüm ve kabûl etmişidi. El-hâletü-hâzihî dükkân-ı mezkûr derûnunda mevcûde sermâye olan elli bin akçeyi dahi kızım müvekkile-i merkūme Hafîze Hatun bana def‘ ü teslîm eylediğinde, ben-dahi yedinden bi’t-tamam ve’l-kemâl tesellüm ve ahz ü kabz eyledim. Ba‘de’l-yevm sermâye-i merkūmeden gerek dükkân-ı merkūmda ve gerek kızım müvekkile-i mezbûrenin yedinde ve zimmetinde asla bir akçe hakkım ve alacağım kalmayup ve gedik ta‘bîr olunur âlât-ı mezkûre târih-i merkūmdan beri kızım mezbûre Hafîze’nin emvâl-i müşterâtı olup benim kat‘â alâka ve medhalim kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 Safer [11]94. Şuhûdü’l-hâl: Müezzin es-Seyyid Süleyman Efendi b. es-Seyyid Ali, el-Hâc İsmail Efendi b. Musa Hatîb-i Câmi‘-i Osmânî, Mu‘îd el-Hâc Hüseyin Efendi b. İbrahim, Pazarbaşı İbrahim Ağa b. el-Hâc Mehmed, el-Hâc İbrahim Efendi b. el-Hâc Mustafa İmâm-ı mahalle, İsmail Efendi b. Hamdullah, Pirinçci Mehmed b. Osman, Ebûbekir Ağa b. el-Hâc Mehmed, es-Seyyid Ömer b. es-Seyyid Osman, Molla Ahmed b. el-Hâc Ömer.