İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 132 Hüküm no: 97 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Hüseyin’in bazı eşyalarını damadı Hafız Mehmed Ağa b. Hasan’a iki yüz guruşa sattığı Mahmiye-i İstanbul’da Atpazarı kurbünde Hüsam Bey Mahallesi’nde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Fâtıma bt. el-Hâc Hüseyin nâm hatun meclis-i şer‘-i hatîr-i lâzımü’t-tevkīrde hâlâ dâmadı işbu bâ‘isü’l-kitâb Hâfız Mehmed Ağa b. el-Hâc Hasan nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna dek yedimde eşyâ-i memlûkem olan bir çift zümrüd küpe ve memlû on iki şayak yasdık ve on iki yemenî basma yasdık ve on minder ve dört şayak mak‘ad ve dört çit mak‘ad ve sekiz baş yasdığı ve üç beledî döşek ve sekiz yorgan ve iki penbe şilte ve altı çârşeb ile kırk vakıyye bakırımı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile iki yüz guruşa dâmadım merkūm Hâfız el-Hâc Mehmed Ağa’ya bey‘ ve temlîk ve teslîm eylediğimde, [29a] ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr iki yüz guruşu bana def‘ ü teslîm eylediğinde, ben-dahi yedinden tamamen tesellüm ve ahz ü kabz eyledim. Ba‘de’l-yevm benim asla alâka ve medhalim kalmayup eşyâ-i muharrere-i mezkûre dâmadım merkūm Hâfız el-Hâc Mehmed Ağa’nın emvâl-i müşterâtı olmuşdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 22 min-Safer [1]194. Şuhûdü’l-hâl: Şâhidûne’s-sâbıkūn.