İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 133 Hüküm no: 98 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdurrahman Ağa b. Çavuşzâde Zeynelabidin’in Derviş Mehmed Efendi b. Veliyüddin’e beş bin guruş borcu kaldığı ve kefilleri Mahmiye-i İstanbul’da At Meydânı kurbünde Helvâcıbaşı Mahallesi’nde müsâfiren sâkin olan Larende a‘yânı Abdurrahman Ağa b. Çavuş-zâde Zeynelabidin nâm kimesne meclis-i şer‘-i hatîr-i lâzımü’t-tevkīrde Hâcegân-ı Dîvân-ı hümâyûn’dan umdetü erbâbü’t-tahrîr ve’l-kalem râfi‘-i hâze’l-kitâb Derviş Mehmed Efendi b. Veliyüddin’in li-ebeveyn er karındaşı ve tarafından husûs-ı âtiyyü’l-beyânda ber-vech-i câ’î tasdîka vekîl-i şer‘îsi mefharu’l-müderrisîni’l-kirâm sa‘âdetlü Abdülkerim Efendi mahzarında ikrâr-ı tâm ve takrîr-i kelâm edip işbu bir kıt‘a mümzâ ve memhûr temessük nâtık olduğu vech üzere müvekkil-i mûmâ-ileyh Derviş Mehmed Efendi’ye cihet-i karzdan zimmetimde on bin [guruş] deynim olup meblağ-ı mezbûrun beş bin guruşunu bundan akdem kendüye edâ ve teslîm eylediğimde, ol dahi yedimden tesellüm ve ahz ve kabz etmişidi. El-hâletü-hâzihî mâ‘adâsı olup bâkī kalan beş bin guruş müvekkil-i mûmâ-ileyh Derviş Mehmed Efendi’ye zimmetimde vâcibü’l-edâ deynimdir dedikde gıbbe’t-tasdîkı’ş-şer‘î meblağ-ı bâkī-i mezbûr beş bin guruşun bi’l-emr ve’l-kabûl müvekkil-i mûmâ-ileyh Derviş Mehmed Efendi’ye edâsına hâzırân bi’l-meclis Selim Efendi b. Abdullah ve dâmadı el-Hâc Ali b. Hasan nâm kimesnelerden her biri kefâlet-i sahîha-i şer‘iyye ile başka başka kefîl ve dâmin olmağın mâ-hüve’l-vâki‘ bi’t-taleb ketb olundu. Fî 21 min-Safer sene [1]194. Şuhûdü’l-hâl: Umdetü erbâbü’t-tahrîr ve’l-kalem Mâliye tezkirecisi es-Seyyid el-Hâc <<İbrahim>> Ahmed Efendi, Mefharu’l-müderrisîni’l-kirâm Şeyh-zâde es-Seyyid Mehmed Şemseddin Efendi, Zübdetü ashâbi’t-tahrîr Baruthâne Nâzırı es-Seyyid Mustafa Efendi, Osman Efendi Emîn-i Sandık-ı sâbık, Ali Efendi b. Selim. Ceffe’l-kalem ve nefede’l-kelâm. Ahmed Ataullah el-kādî bi-Dârü’l-hilâfeti’l-aliyye harrerehû el-fakīr ileyhi azze şânühu ‒ufiye anh‒ Ahmed Atâ hâhdâr-ı feyz-i Hudâ [28b] An-zamân-ı Dürrîzâde Efendi.