.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 117
Hüküm no: 121
Orijinal metin no: [18b-4]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Hasan Efendi’nin, el-Hâc Salim’e olan borcuna karşılık evini rehin olarak verdiği

Mahmiye-i İstanbul’da Hoca Üveys Mahallesi’nde sâkin Hasan Efendi b. Abdülaziz nâm kimesne meclis-i şer‘-i hatîr-i lâzımü’t-tevkīrde işbu sâhibü’l-kitâb el-Hâc Salim b. Cuma nâm kimesne muvâcehesinde ikrâr ve takrîr-i kelâm edip mezbûr el-Hâc Salim’e hâlâ yedinden müşterâ ve makbûzum olan mikdârı beynimizde ma‘lûm kahve bahâsından ve cihet-i karzdan bin yedi yüz yetmiş dokuz esedî guruş ve yedinde olan iki kıt‘a mümzâ ve mahtûm temessük mûcebince mukaddemâ mezbûr el-Hâc Salim’den iktirâz ve tesellüm eylediğim bir def‘a yüz doksan beş esedî guruş ve bir def‘a dahi üç yüz elli esedî guruş ki cem‘an iki bin üç yüz yirmi dört esedî guruş deynimden bin üç yüz esedî guruş mukābelesinde mahalle-i mezbûre ve vâki‘ bir tarafdan Habane bt. Abdullah nâm hatun mülkü ve tarafeyni el-Hâc İlyas Vakfı’na ve bir tarafdan tarîk-i âm ile mahdûd olan mülk menzilimi ba‘de’t-tahliyyeti’ş-şer‘iyye rehin vaz‘ edip yedine teslîm eyledim ol dahi irtihân ve kabûl ve tesellüm eyledi, meblağ-ı sâlifü’z-zikr iki bin üç yüz yirmi dört esedî guruş mezbûr el-Hâc Salim zimmetinde lâzımü’l-edâ ve vâcibü’l-[kazâ] deynimdir dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb ü sebt olundu.

Fi’l-yevmi’s-sâbi‘ min-Zilka‘deti’ş-şerîfe li-sene selâse ve sittin ve elf.

Şuhûdü’l-hâl: el-Hâc Ali Efendi b. Salih, el-Hâc Ahmed el-Hayyât, el-Hâc Ramazan b. Mehmed, Ahmed Çelebi b. Mehmed ve gayruhum mine’l-huzzâr.