İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 134 Hüküm no: 99 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Aziz’in Sarıgörez’deki ekmek fırını ve değirmenin sekiz hissesini Yorgo v. Rabyo ile İstoco v. Filib’e üç bin beş yüz guruşa sattığı Habbâz İhrâc-şüd fî 14 C sene 1262. Mahmiye-i İstanbul’da Sarıgez (Sarıgörez) kurbünde vâki‘ bir bâb ekmekçi fırınında sâkin Arnabud Süleyman b. Aziz nâm kimesne meclis-i şer‘-i şerîf-i enverde işbu hâmilü’r-rakīm Yorgo v. Rabyo ve İstoco v. Filib nâm zimmîler muvâcehelerinde zikri âtî fırın ve değirmen şerîkleri Nezir ve İbrahim ibney Ebûbekir nâm karındaşlar ile Molla Hüseyin b. Ali hazır oldukları hâlde ikrâr-ı tâm ve takrîr-i kelâm edip zikrolunan bir bâb ekmekçi fırını ve ona merbût ittisâlinde [kâin] beş horoslu bir bâb ekmekçi değirmeni derûnlarında mevcûde beyne’l-hiref gedik ta‘bîr olunur yirmi re’s bargir ve mahsûs olan sâir âlât-ı lâzıme-i ma‘lûmenin ikişer bargirden dört bargir hissesi merkūmân Nezir ve İbrahim’in ve sekiz bargir hissesi merkūm Molla Hüseyin’in ve mâ‘adâ sekiz bargir hissesi dahi akd-i âti’z-zikrin sudûruna değin benim iştirâken ve şâyi‘an yedimizde mülk ve hakkımız olmağla, hâlâ ben ber-vech-i muharrer mâlik olduğum sekiz bargir hissemi tarafeynden bi’l-îcâb ve’l-kabûl bâtten ve sahîhen şerîklerim hâzırûn-ı mezbûrûnun izin ve icâzetleriyle mersûmân Yorgo ve İstoco zimmîlere üç bin beş yüz guruşa ale’l-iştirâki’s-seviy bey‘ ve temlîk ve teslîm eylediğimde, onlar dahi ber-vech-i muharrer iştirâ ve temellük ve tesellüm ve kabûl ve semeni olan meblağ-ı mezkûru bana def‘ ü teslîm, ben-dahi yedlerinden tamamen ahz ü kabz edip ba‘de’l-yevm fırın ve değirmen-i mezkûrun ber-i‘tibâr-ı merkūm sekiz bargir hissesi müşteriyân-ı mersûmânın mülk-i müşterâları ve hakk-ı sırfları olmuşdur dedikde gıbbe[‘t-tasdîkı’ş-şer‘î mâ-vaka‘a bi’t-taleb ketb olundu]. Fî 7 min-Rebî‘ülevvel sene 1194. Şuhûdü’l-hâl: Kethudâ-yı Habbâzân İsmail Ağa, Yiğitbaşı es-Seyyid Mehmed Emin Ağa, Uncular Kethudâsı Mustafa Ağa, Veliyüddin Ağa, Kara Mehmed Usta, Muhzır Kemahlı İbrahim b. ( ).