İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 135 Hüküm no: 100 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âlime Hatun Vakfı’na ait Emin Bey Mahallesi’ndeki yanmış arsa üzerine bina inşası için mütevellînin mahalle imamı Mustafa b. Ali’ye izin verdiği Mülkiyete izin İstanbul’da Parmakkapı kurbünde Emîn Bey Mahallesi ahâlîsinden bâ‘isü’l-kitâb el-Hâc Mustafa b. Ali nâm kimesne meclis-i şer‘-i hatîr-i lâzımü’t-tevkīrde mahalle-i mezbûre imâmı olup ashâb-ı hayrâtdan merhûme Âlime Hatun’un vakf edip arsa ve gallesini mahalle-i mezbûre imâmlarına şart eylediği bir tarafdan vakf-ı mezbûrdan Musâhib Hızır Ağa menzili ve bir tarafdan Çıkrıkçı Hasan Vakfı’ndan kezâlik mezbûr Hızır Ağa menzili ve bir tarafdan Firuzağa Vakfı’ndan Çukadâr Süleyman Ağa menzili ve taraf-ı râbi‘den tarîk-i âm ile mahdûd zikri âtî yüz kırk altı zirâ‘ muhterik arsa üzerinde olan enkāz-ı mevcûde-i mu‘ayyeneye vaz‘-ı yedi mütehakkık olan Hasan Efendi b. Mehmed nâm kimesne mahzarında üzerine da‘vâ ve takrîr-i kelâm edip mezbûr Hasan Efendi arsa-i mezbûre üzerinde olup bundan akdem vukū‘ bulan harîkde muhterik ebniyeden bâkī dîvâr ve mahzeni müştemil ve beher yevm birer akçeden senede üç guruş mukāta‘a-i kadîmesi olup üzerinde olan ebniyesi yedimde mülküm olan enkāza bi-gayr-ı hakkın vaz‘-ı yed ve beni binâ ihdâsından men‘ eder, suâl olunup mümâna‘atı men‘ ve def‘ olunmak murâdımdır dedikde imâm-ı mezbûr Hasan Efendi mârrü’l-beyân enkāz-ı mevcûde-i mu‘ayyeneye vaz‘-ı yedini ikrâr ve i‘tirâf edip lâkin zikrolunan yevmî bir akçe icâre enkāz-ı mevcûde ile meşgūl olan arsa-i mezkûrenin ecr-i mislinden noksan-ı fâhiş ile nâkıs olmağla, arsa-i mezkûrenin mukāta‘ası ecr-i misline iblâğ olunmak bi’t-tevliye murâdımdur deyü beynlerinde ba‘de vukū‘ı’l-münâza‘a mezbûr el-Hâc Mustafa Ağa mukāta‘a-i kadîme-i mezkûrenin üzerine birer guruş zamm ile mukāta‘a-i kadîme-i mezkûresi el-yevm ecr-i misli olan [30a] senevî dört guruşa iblâğ eyledikde, mütevellî-i merkūm Hasan Efendi dahi râzî olup ve arsa-i mezkûre üzerine her ne binâ ederse mülkü olmak üzere izin verüp bu vechile yedinde ibkā ve ber-minvâl-i muharrer temessük vermeğe ta‘ahhüd etmeğin mâ-hüve’l-vâki‘ bi’t-taleb ketb olundu. Fî 7 min-Rebî‘ülevvel sene [1]194. Şuhûdü’l-hâl: Bağçevân-zâde sâbık Yazıcı Mustafa Efendi, Ahmed Bey b. Mustafa, Mahalle-i mezbûre müezzini el-Hâc Hasan, Yoğurtcu el-Hâc Hüseyin, Kahve[ci] el-Hâc Mehmed, Ahmed Efendi b. Ali, Mehmed Sâdık b. Ahmed.