İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 136 Hüküm no: 101 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dürrîzâde Mustafa Efendi Vakfı mütevellîsinin Hoca Üveys Mahallesi’ndeki menzili vakfa akar olmak için dokuz yüz elli guruşa satın aldığı Mübâya‘a li’l-vakf Sâbıkā mesned-ârâ-yı sadr-ı fetvâ ve zîb-efzâ-yı erîke-i takvâ şeyh-i meşâyihi’l-İslâm el-merhûm ve’l-mağfûr ‒ed-dâricü ile’l-medârici Rabbihi’l-Gafûr‒ Dürrîzâde el-Hâc Mustafa Efendi hazretlerinin Mahmiye-i İstanbul’da hısnı ebvâbından Edirne Kapısı dâhilinde Keçeci Pîrî Mahallesi’nde vâki‘ merhûm ve mağfûrun-leh Abdülkadir Efendi zâviyesinde muvaffak oldukları mevlûd-i şerîf vakfının bi’l-fi‘il mütevellîsi olup galle-i vakıfdan dahi akār iştirâsına kıbel-i şer‘den me’zûn olan eşrâf-ı kuzât-ı kirâmdan es-Seyyid Mehmed Mutahhar Efendi meclis-i şer‘-i hatîr-i lâzımü’t-tevkīrde mahmiye-i mezbûrede Hoca Üveys Mahallesi sükkânından olup mahalle-i mezkûrede vâki‘ zikri câ’î bir bâb mülk menzile vâzı‘u’l-yed idiği mütehakkık olan Kilârî Mustafa Efendi b. Abdullah mütevellî-i mûmâ-ileyh es-Seyyid Mehmed Mutahhar Efendi mahzarında bi-tav‘ihî ikrâr-ı tâm ve takrîr-i kelâm edip işbu akd-i âti’z-zikrin sudûruna değin silk-i mülk-i sahîhimde münselik olup sâlifü’l-beyân Hoca Üveys Mahallesi’nde vâki‘ bir tarafdan Emine Hatun menzili ve bir tarafdan yine mezbûre Emine Hatun Bağçe[si] ve bir tarafdan Mehmed Odabaşı menzili ve bir tarafdan [tarîk-i] âm ile mahdûd hâriciyede tahtânî bir oda ve bir sofa ve kenîf ve havlu ve dâhiliyede fevkānî iki oda ve sofa ve matbah ve bi’r-i mâ’ ve eşcâr-ı müsmire ve gayr-ı müsmireli bağçe ve zukāk kapısını ve sâir müştemilât-ı ma‘lûmeyi muhtevî bir bâb mülk menzilimi, bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile vakf-ı mezkûra akār olmak üzere mütevellî-i mûmâ-ileyh es-Seyyid Mehmed Mutahhar Efendi’ye dokuz yüz elli guruşa bey‘ ve teslîm eylediğimde, ol dahi galle-i vakf-ı mezkûr ile vakıf içün iştirâ ve tesellüm ve kabûl edip semeni olan meblağ-ı mezkûr dokuz yüz elli guruşun yüz elli guruşunu galle-i mezkûrdan olmak üzere mütevellî-i mûmâ-ileyh es-Seyyid Mehmed Mutahhar Efendi yedinden ahz ü kabz edip bâkī sekiz yüz guruşu taraf-ı vakıfdan ba‘de’l-ibkā, fîmâ-ba‘d zikrolunan menzil-i mahdûd-ı mezkûrda benim asla ve kat‘â alâka ve medhalim kalmayup bi-cümletin mâ-yeştemiluhû ve yahvîhi vakf-ı mezkûr müsekkafâtından oldukdan sonra mütevellî-i mûmâ-ileyh menzil-i mezkûr[u] sekiz yüz guruş icâre-i mu‘accele ve yevmî bir akçe icâre-i mü’eccele ile bi’t-tevliye bana îcâr ve teslîm, ben-dahi ber-minvâl-i muharrer istîcâr ve kabûl edip mu‘accel-i mezkûr sekiz yüz guruşu semen-i mezkûrdan taraf-ı vakıfda ibkā eylediğim meblağ-ı mezkûr sekiz yüz guruşa ba‘de’t-takās ve’l-mukāssa ve’l-kabûl menzil-i mahdûd-ı mezkûr benim dâhil-i havza-i tasarrufum olmağın, menzil-i mezkûrun tağrîr ve gabnine ve mu‘accel-i mezkûrun [30b] adem-i istifâsına müte‘allika âmme-i de‘âvî ve mutâlebâtdan cânib-i vakf-ı şerîfi ve mütevellî-i mûmâ-ileyhin zimmetini ibrâ-i âmm-ı râfi‘ü’l-hısâm ile ibrâ ve ıskāt eylediğimde, mütevellî-i mûmâ-ileyh dahi ibrâ-i mezkûru kabûl eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Hurrire fî 7 min-Rebî‘ülevvel [li-]sene [1]194. Şuhûdü’l-hâl: Mehmed Ağa b. Ahmed, Kethudâ Mustafa Efendi, İmâm Hâfız Mehmed Emin Efendi, İsmail Çelebi, Molla Abdülkadir b. Mustafa, Başçukadâr Hasan Efendi b. Yusuf.