İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 137 Hüküm no: 102 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul kalaycılar esnafının kethudalığına Mustafa Usta b. Muslı’nın tayin edildiği Kethudâ-yı kalaycıyân İstanbul’da vâki‘ kalaycı esnâfının yiğitbaşısı İsmail Usta ve ihtiyârlarından el-Hâc Hasan Usta ve Mütevellî Mustafa Usta ve el-Hâc Mustafa ve Abdullah Usta ve Ahmed Usta ve diğer el-Hâc Mustafa ve Hüseyin Usta ve el-Hâc Mehmed Usta ve Osman Usta ve Hasan Usta ve Ömer Usta ve Ali Usta ve el-Hâc Hasan ve Ali Usta ve Hüseyin Usta ve es-Seyyid İbrahim Usta ve es-Seyyid Hüseyin Usta ve Yusuf ve Osman Usta ve Salih Usta ve sâirleri meclis-i şer‘-i hatîr-i lâzımü’t-tevkīrde her biri takrîr-i kelâm ve ta‘bîr ani’l-merâm edip kethudâmız olan işbu el-Hâc İbrahim b. Musa nâm kimesne kethudâlık-ı mezkûru âhara ferâğ ve kasr-ı yed etmek murâd etmekle, işbu râfi‘ü’l-kitâb Kantarcılar içinde sâkin Mustafa Usta b. Muslı esnâfımızın kudemâsından örf ve âdetimize vâkıf ve nizâm [ve] intizâmımızı mûcib olan umûr ve ahvâlimize kemâ-yenbagī ârif ve her vechile kethudâlık hizmetini rü’yete kādir ve cümlemizin muhtârı olan mezbûr Mustafa Usta’ya kasr-ı yed ve üzerimize kethudâ nasb olunmak cümlemizin murâdımızdır dediklerinde mezbûr el-Hâc İbrahim dahi kethudâlık-ı mezkûru hüsn-ı rızâ ve tayyib-i ihtiyârıyle mezbûr Mustafa Usta’ya ferâğ ve kasr-ı yed eyledikde, hâkim-i muvakki‘-i sadr-ı kitâb bi-tevkī‘ihi’r-refî‘ü’l-müstetâb ‒rafe‘a kadrehû mevlâhü’l-Vehhâb‒ efendi hazretleri dahi mezbûr Mustafa Usta’yı tâife-i mezbûre üzerlerine kethudâ nasb ve ta‘yîn ve umûrlarını ber-mu‘tâd-ı kadîm rü’yet ve bir ferdi hilâf-ı şer‘-i mutahhar rencîde ve ta‘cîz etmemek üzere tenbîh buyurduklarında, ol dahi kabûl ve hidemât-ı lâzımesini mahâllinde ikāmete ta‘ahhüd etmeğin mâ-vaka‘a bi’t-taleb ketb olundu. Fî 7 min-şehri Rebî‘ülevvel sene [1]194. Şuhûdü’l-hâl: Akşehirli Osman, İsmail Çelebi, Duhânî Ali Çelebi, Abdülhalim Efendi, Mehmed Tahir Efendi.