İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 139 Hüküm no: 104 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul camcılar esnafı kethudalığına Ali Usta b. İbrahim’in tayin edildiği Kethudâ-yı camcıyân İstanbul’da vâki‘ camcı esnâfının yiğitbaşısı Ahmed Usta ve ihtiyârlardan Mehmed Usta ve Osman Usta ve el-Hâc Mustafa Usta ve Ahmed Usta ve Halil Usta ve Salih Usta ve Mehmed Usta ve diğer Salih Usta ve Ali Usta ve Hasan Usta ve diğer Ahmed Usta ve diğer Ahmed Usta ve diğer Ali Usta ve diğer Ali Usta ve diğer Ali Usta ve Mustafa Usta ve el-Hâc Mehmed ve Mehmed Usta ve diğer Ali Usta ve diğer Mustafa Usta ve Ömer Usta ve el-Hâc Ali ve diğer Ahmed Usta ve diğer Halil Usta ve diğer Ali Usta ve diğer Mehmed Usta ve diğer Ahmed ve İsmail Usta ve Mehmed Usta ve sâirleri meclis-i şer‘-i hatîr-i lâzımü’t-tevkīrde her biri takrîr-i kelâm ve ta‘bîr ani’l-merâm edip bilâ-sened-i şer‘î kethudâmız olup Camcıbaşı olan Mehmed Usta nâm kimesne umûr ve mesâlihimizi rü’yetde tekâsül ve aczi olup kethudâlıkdan bi’l-külliye keff-i yed etmekle, yerine işbu bâ‘isü’l-kitâb Hâfız Paşa Câmi‘-i şerîfi karşusunda sâkin Ali Usta b. İbrahim tâife-i mezbûrenin kudemâsından örf ve âdetimize vâkıf ve nizâm [ve] intizâmımızı mûcib olan umûr ve ahvâlimize kemâ-yenbagī ârif ve her vechile kethudâlık hizmetini rü’yete kādir ve cümlemizin mümtâz ve mu‘temedi olmağla, kıbel-i şer‘den mezbûr Ali Usta üzerimize kethudâ nasb ve ta‘yîn olunmak matlûbumuzdur deyü iltimâs etmeleriyle, hâkim-i muvakki‘-i sadr-ı kitâb bi-tevkī‘ihi’r-refî‘ü’l-müstetâb ‒tûbâ-lehû ve hüsnü-meâb‒ efendi hazretleri [31b] dahi mezbûr Ali Usta’yı tâife-i mezbûre üzerlerine kethudâ nasb ve ta‘yîn ve umûrlarını ber-mu‘tâd-ı kadîm rü’yet ve bir ferdi hilâf-ı şer‘-i mutahhar rencîde etmemek üzere tenbîh buyurduklarında, ol dahi kabûl ve hizmet-i lâzımesini kemâ-hüve hakkuhû mahâllinde ikāmete ta‘ahhüd etmeğin mâ-vaka‘a bi’t-taleb ketb olundu. Fî 7 Rebî‘ülevvel sene [11]94. Şuhûdü’l-hâl: Muhzırlar Kethudâsı Mehmed Ağa b. Ahmed, Muhzır İsmail Çelebi b. Ali, Akşehirli Osman b. Mehmed, Molla Mehmed Said b. Salih.