İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 140 Hüküm no: 105 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Markar v. Avyan’ın Mahmud Paşa Camii yakınındaki tütüncü dükkânı gediğini Agop v. Markos’a iki yüz elli guruşa sattığı Mübâya‘a-ı âlât-ı tütüncü Tütüncü esnâfından Markar v. Avyan nâm zimmî meclis-i şer‘-i hatîr-i lâzımü’t-tevkīrde işbu bâ‘isü’s-sifr Agop v. Markos muvâcehesinde ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimde mülk ve hakkım olup İstanbul’da Mahmud Paşa Câmi‘-i şerîfi kurbünde Yarım Han demekle ma‘rûf hânın tahtında kâin bir bâb tütüncü dükkânında mevcûde beyne’l-esnâf gedik ta‘bîr olunur bir peş-tahta ve bir peşkün ve terâzi ve ma‘lûmü’l-vezn duhan ve ma‘lumü’l-aded kavanos ve kahve ibriği ve fincan ma‘a zarf ve tebsi ve kahve kutusu ve mangal ve mangal tahtası ve âlât-ı sâire-i ma‘lûmemi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mesfûr Agop zimmîye bin yüz doksan üç senesi Zilka‘deti’ş-şerîfesi’nin on beşinci günü iki yüz elli guruşa bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ve kabûl ettikden sonra semeni olan meblağ-ı mezkûr iki yüz elli guruşu müşteri-i mesfûr Agop zimmî yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mesfûr Agop zimmînin zimmetini ibrâ-i âm ile ibrâ ve ıskāt, ol dahi ber-vech-i muharrer ibrâ-i mezkûru kabûl ve eşyâ-i muharrere-i mezkûrede benim asla ve kat‘â alâka ve medhalim kalmayup müşteri-i mesfûr Agop zimmînin mülk-i müşterâsı ve hakk-ı sırfı olup keyfe mâ yeşâ’ ve yahtâr mutasarrıf olsun dediğini mesfûr Agop zimmî tasdîk etmeğin mâ-vaka‘a bi’t-taleb ketb olundu. Fî 11 min-Rebî‘ülevvel sene [1]194. Şuhûdü’l-hâl: Akşehirli Osman b. Mehmed el-Muhzır, İsmail Çelebi b. Ali el-Muhzır, Çukadâr Mehmed Ağa.