İstanbul Mahkemesi 44 Numaralı sicil (H. 1193-1194 / M. 1779-1780) cilt: 78, sayfa: 141 Hüküm no: 106 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Ahram v. Kasber’in Balat Kapısı’ndaki ekmek fırını ve değirmenin on hissesini Repail v. Arutin’e bin sekiz yüz guruşa sattığı Mübâya‘a-i habbâz Habbâz tâifesinden Ahram v. Kasber nâm zimmî meclis-i şer‘-i hatîr-i lâzımü’t-tevkīrde tâife-i mezbûreden işbu bâ‘isü’s-sifr Repail v. Arutin nâm zimmî muvâcehesinde ikrâr-ı tâm ve takrîr-i kelâm edip işbu akd-i âti’z-zikrin sudûruna değin yedimde mülk ve hakkım olup mahmiye-i İstanbul hısnı ebvâbından Balat Kapısı dâhilinde Boyacı fırını demekle ma‘rûf bir bâb ekmekçi fırını ve ona merbût ittisâlinde kâin beyne’l-esnâf gedik ta‘bîr olunur yirmi dört sehim i‘tibâriyle altı horoslu bir değirmende olan on re’s bargir ve on re’s bargire isâbet eden sâir âlât-ı lâzıme-i ma‘lûmemi tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müşteri-i mesfûr Repail zimmîye bin sekiz yüz guruşa bey‘ ve temlîk ve teslîm eylediğimde, ol dahi ber-vech-i muharrer iştirâ ve temellük ve tesellüm ve kabz ve kabûl ettikden sonra semeni olan meblağ-ı mezkûr bin sekiz yüz guruşu mesfûr Repail zimmî yedinden bi’t-tamam ve’l-kemâl ahz ü kabz edip bey‘-i mezkûrun tağrîr ve gabnine ve gedik husûsuna müte‘allika âmme-i de‘âvî ve kâffe-i mutâlebâtdan mesfûr Repail zimmînin zimmetini ibrâ ve ıskāt eylediğimde, ol dahi ibrâ-i mezkûru kabûl edip fîmâ-ba‘d zikrolunan on re’s bargir ve on re’s bargire isâbet eden sâir âlât-ı lâzıme-i ma‘lûmede benim asla ve kat‘â alâka ve medhalim kalmayup müşteri-i mesfûr Repail zimmînin mülk-i müşterâsı ve hakk-ı sırfı olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 9 min-Ra sene [1]194. Şuhûdü’l-hâl: es-Seyyid Mehmed Said, el-Hâc Ahmed Ağa, Uncular Kethudâsı Mustafa Ağa, Yiğitbaşı es-Seyyid Mehmed Emin, Mikail v. İstefan, Vartan v. Tomas, Bedros v. Begos.